बेल्जियमवासी नेपालीहरूले विभिन्न कार्यक्रममा सहभागी हुन युरोप पुगेका नायक राजेश हमालसँग भेटघाट तथा अन्तरक्रिया गरेका छन् । सोमबार (सेप्टेम्बर २५) बेल्जियमको हेरेन्तस्थित एक होटलको सभाहलमा उपस्थित नेपालीहरूले नायक हमालसँग विभिन्न विषयमा सम्वाद गरेका हुन् । 

कार्यक्रमको शुरूआतमै हमालले विदेशमा रहेका नेपाली समुदायले नेपालको अर्थतन्त्रको क्षेत्रमा पुर्‍याएको योगदानको प्रशंसा  गरे। कृषि प्रधान देशले कृषि नै नगरेका कारण युवाहरू विदेशिन बाध्य भएको उनको भनाइ थियो । 

'मैले नेपालमा एक लाखको आइफोन किन्न सक्छु तर, एक लाख तिरेर पनि गुणस्तरीय सागसब्जी किन्न सक्दिनँ,' हमालले भने, 'कम्प्युटर चलाउने काम गर्न पनि खानुपर्छ। प्रविधिको विकास भएर मात्रै हुँदैन, हाम्रो देशको अर्थतन्त्रको सुधार कृषि कर्मबाट मात्रै सम्भव छ।'

युरोपमा रहेको पहिलो पुस्ताले आफ्ना सन्तानलाई नेपालबारे बुझाउनु पर्ने र आफ्नो 'ओरिजिन' बिर्सिन नहुने उनले बताए । मान्छे जता पुगेर जसरी बसे पनि नेपालीको पहिचान कसैले मेटाउन नसक्ने उनको भनाइ थियो । 

त्यसपछि व्यवसायी संध बेल्जियमका पूर्वअध्यक्ष यमु निरौलाले हमाललाई तपाई नेपाली राजनीतिमा आउने सम्भावना के छ भनेर प्रश्न गरे । यस्तै एनएरएनए बेल्जियमका महिला उपाअध्यक्ष सावित्री गिरीले नेपालको कृषि प्रणालीलाई व्यवहारिक बनाउन के गर्नुपर्ला भन्ने प्रश्न गरेकी थिइन् । 

प्रश्नको जवाफ दिँदै हमालले राजनीतिक रूपमा जनताको दैनिकी दुःखदायी नै रहेको बताए। नेपाली नागरिकलाई राजनीति गर्न छुट भए पनि आफूले अहिले नै राजनीतिमा आउने मनस्थिति नबनाएको उनले प्रस्ट्याए । नेताहरूले आफ्नो शैली र संस्कार बदल्नु पर्ने उनको भनाइ थियो ।

त्यससैगरी कलाकार संघ बेल्जियमका अध्यक्ष बलराम पुनले हमालले शिक्षा र अभिनयलाई कसरी सँगसँगै अगाडि बढाउन सके भन्ने प्रश्न गरेका थिए। स्तम्भकार दिल निशानी मगरले हमाल एक युगको ईतिहास पनि भएको भन्दै ४० देखि ८० को दशकभित्र नेपालमा देखा परेको राजनीतिक, आर्थिक र सांस्कृतिक उचारचढावबारे प्रश्न गरेका थिए। 

हमाललाई  यूरोपियन यूनियनका लागि नेपाली राजदूत गेहेन्द्र राजभण्डारी र एनएरएनए बेल्जियमका अध्यक्ष सिता सापकोटाले स्वागत गरेका थिए ।

राजदूत भण्डीरीले नेपाली चलचित्रको दायरा फराकिलो बनाउन नायक हमालले महत्वपूर्ण भूमिका खेलेको भन्दै आफू हमालको राम्रो दर्शक भएको बताए। ​त्यसैगरी एनआरएनए बेल्जियम अध्यक्ष सिता सापकोटाले हमालको बौद्धिक छविको आफू ठूलो प्रशंसक भएको बताइन्। 

एनआरएनए बेल्जियम र अन्तराष्ट्रिय नेपाली कलाकार समाज इनास बेल्जियमको संयुक्त आयोजनामा आयोजना गरिएको कार्यक्रममा नायक हमालसँग च्यारिटी डिनर गर्नुका साथै सांगितिक प्रस्तुतिहरू समेत देखाइएको थियो ।