रातोपाटी डटकमका सम्वाददाता कृष्ण सिंह धामीलाई अज्ञात समूहले आक्रमण गरेको छ । वैदेशिक रोजगार तथा शिक्षा बिट हेर्ने सम्वाददाता धामीलाई सोमवार अपराह्न सवा ४ बजेतिर मोटरसाइकलमा आएका ७/८ जनाको समूहले कार्यालय नजिकै आक्रमण गरेको रातोपाटीका प्रबन्ध निर्देशक अर्जुन पन्तले जानकारी दिए ।

उनका अनुसार धामी खाजा खाएर कार्यालय फर्किने क्रममा अज्ञात समूहले बखुण्डोलनजिकै सांघातिक आक्रमण गरेको हो । समूहको कुटपिटबाट सामान्य घाइते भएका धामीलाई सुमेरु सिटी अस्पतालमा भर्ना गरिएको थियो । हाल उनी डिस्चार्ज भइसकेका छन् । घटनाबारे प्रहरीलाई जानकारी गराइएको र प्रहरीले अनुसन्धानसमेत गरिरहेको पन्तले बताए ।

'हामीलाई विप्लव समूह(नेकपा)को विद्यार्थीमाथि आशंका छ । विद्यार्थी संगठनसम्बन्धी धामीले समाचार लेख्दा विज्ञप्ति नै जारी गरेर भौतिक आक्रमण गर्ने धम्की दिएका थिए,' पन्तले लोकान्तरसँग भने ।

घटनाप्रति पत्रकार महासंघसहितका संघ संगठनले दु:ख व्यक्त गर्दै आक्रमणमा संलग्नमाथि तत्काल कडा कारबाही गर्न माग गरेका छन् ।