‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेका २४ घण्टाका मुख्यमुख्य घटनाक्रमसहित उपस्थित भएका छौँ–

नेपाली कांग्रेसको केन्द्रीय कार्यसमितिको बैठक विभिन्न ११ वटा निर्णय गर्दै सकिएको छ । पार्टी कार्यालयका मुख्यसचिव कृष्णप्रसाद पौडेलले सोमवार साँझ एक विज्ञप्ति जारी गर्दै ११ वटा निर्णयबारे जानकारी दिएका हुन् ।
जसमा युवा पलायन रोक्नेदेखि बेरोजगारी समस्या हटाउनेसम्मका विषय समेटिएका छन् ।

केन्द्रीय समिति बैठक सकिएसँगै नेपाली कांग्रेस महासमिति बैठकको तयारीमा जुटेको छ । अगामी मंसिरमा हुने बैठकका लागि सभापति शेरबहादुर देउवाको नेतृत्वमा मूलआयोजक समितिसहितका अन्य विभिन्न समिति गठनको निर्णय गरिएको छ।  

यस्तै उपसभापति पूर्णबहादुर खड्काको नेतृतवमाप्रस्ताव तयारी समिति, महामन्त्री गगन थापाको नेतृत्वमा संगठन र महामन्त्री विश्वप्रकाश शर्माको नेतृत्वमा राजनीतिक प्रस्ताव समिति गठन गरिएको छ । आवश्यकताअनुसार अरु समिति थप्दै जाने सो पार्टीले जनाएको छ । कांग्रेसको महासमिति बैठक आगामी मंसिर १३, १४ र १५ गतेका लागि तोकिएको छ । 
००००
लोकतान्त्रिक समाजवादी पार्टी (लोसपा) नेपालका शीर्ष नेताहरूले छोरीज्वाइँदेखि सम्धीसम्धिनीसम्मलाई पदाधिकारी बनाएका छन् । यसले सो पार्टीमा परिवारवादको चरम नमुना देखिएको छ । 

लोसपाका अध्यक्ष महन्थ ठाकुरले सम्धी उमाकान्त झालाई वरिष्ठ उपाध्यक्ष, सम्धिनी इन्दिरा झालाई उपाध्यक्ष र छोरी मिनाक्षी ठाकुरलाई केन्द्रीय सदस्य मनोनयन गरेका छन् ।

त्यसैगरी वरिष्ठ नेता राजेन्द्र महतोले आफ्ना ज्वाइँ अनिल महासेठलाई महासचिव बनाएका छन् भने भतिज उपेन्द्र महतोलाई पनि महासचिवमै मनोनयन गरेका छन् ।

त्यसैगरी अर्का  वरिष्ठ नेता शरतसिंह भण्डारीले छोरी सृष्टि सिंह भण्डारीलाई सचिव बनाएका छन् । भण्डारी निकट मानिने निर्जला राउतलाई वरिष्ठ उपाध्यक्ष तथा कोषाध्यक्षको दोहोरो जिम्मेवारी दिइएको छ ।
राष्ट्रिय पार्टी बन्न नसकेको लोकतान्त्रिक समाजवादी पार्टीमा ६३ जना पदाधिकारी चयन गरिएको छ ।
००००
नेपाल र चीनबीच १२ सम्झौता र १ सहमति पत्रमा हस्ताक्षर भएको छ ।
प्रधानमन्त्री पुष्पकमल दाहाल ‘प्रचण्ड’ र चिनियाँ समकक्षी ली छ्याङबीच सोमवार बेइजिङमा भएको द्विपक्षीय वार्तापछि ती सम्झौतामा हस्ताक्षर भएको हो ।
००००
चाडपर्व लक्षित विशेष सुरक्षा योजना बनाएर लागू गर्न प्रहरी प्रधान कार्यालयले देशैभरका प्रहरी युनिटहरूमा सर्कुलर जारी गरेको छ ।
 नेपाल प्रहरीका केन्द्रीय प्रवक्ता प्रहरी नायब महानिरीक्षक कुवेर कडायतले नजिकिँदो चाडपर्वलाई लक्षित गरी आवश्यक सुरक्षा प्रबन्धसहित सुरक्षा योजना तयार पारी लागू गर्न सर्कुलर जारी गरेको जानकारी दिए ।
००००

विराटनगरमा सोमवार भएको प्रदेशस्तरीय सुरक्षा संयन्त्रको बैठकमा सुरक्षा निकायका प्रमुखहरूले कोशी प्रदेशमा जाति तथा धार्मिक मुद्दाले खलल र्पुयाइरहेको ब्रिफिङ गरेका छन् ।
 नेपाल प्रहरीका प्रहरी महानिरीक्षक (आईजीपी) वसन्तबहादुर कुँवर, सशस्त्र प्रहरी बलका आईजीपी राजु अर्याल, राष्ट्रिय अनुसन्धानका विभागका प्रमुखले कोशी प्रदेशमा पहिचान र धार्मिक मुद्दाले प्रदेशको शान्ति सुरक्षालाई खलल र्पुयाइरहेको बताएका हुन् ।
००००
नेपाली कांग्रेस सभापति शेरबहादुर देउवाले अदालतले फैसला नगरेसम्म बालकृष्ण खाँणलाई दोषी भन्न नहुने बताएका छन् । केन्द्रीय समितिको बैठकलाई समापन गर्दै देउवाले नक्कली भुटानी शरणार्थी प्रकरणलाई उल्लेख गर्दै अदालतमा मुद्दा चलेकै भरमा कसैलाई दोषी करार गर्न नहुने उनले स्पष्ट पारे ।
००००
संघीय संसद्को राज्य व्यवस्था समितिमा दुई सुरक्षा निकायका प्रमुखले ‘सुरक्षा थ्रेट’को विषय उठाएपछि अहिले एक प्रकारको तरंग पैदा भएको छ ।
नेपालको सुरक्षा अवस्था र सामाजिक, धार्मिक विषय कति संवेदनशील छ भन्ने कुरा सशस्त्र प्रहरी बलका महानिरीक्षकराजु अर्याल र नेपाल प्रहरीका महानिरीक्षक वसन्त कुँवरले संसदीय समितिमा उठाएको विषयले दर्शाउँछ ।
पछिल्लो समय नेपालमा पहिचान र धार्मिक विषयको असन्तुष्टि तथा आन्दोलनले राष्ट्रिय सुरक्षामा कस्तो असर पारेको छ भन्ने कुरा उनीहरूले उठाएका थिए ।
००००
पूर्वमन्त्री रामकुमार श्रेष्ठलाई भ्रष्टाचार मुद्दामा विशेष अदालतले ६ महिना कैद र ९८ लाख  २९ हजार ५३७ रुपैयाँ जरिवाना गरेको छ ।
विशेष अदालतका सूचना अधिकारी धनबहादुर कार्कीका अनुसार बिगो बमोजिमको सम्पत्ति जफतसमेत हुने फैसला भएको हो । 
००००
कोशी प्रदेशका मुख्यमन्त्री हिक्मतकुमार कार्कीले मन्त्रिपरिषद् विस्तार गर्दै थप चारजना मन्त्री नियुक्त गरेका छन् ।  
सुनसरीबाट निर्वाचित प्रदेश सांसद रामप्रसाद मेहता, मोरङका लीलावल्लभ अधिकारी, धनकुटाका नीरन राई र सोलुखुम्बुका बुद्धिकुमार राजभण्डारीलाई सोमवार मन्त्रीमा नियुक्त गरिएको हो ।
००००
माल्दिभ्सलाई फराकिलो गोल अन्तरले हराउँदै नेपाल यू–१९ साफ च्याम्पियनसिप फूटबलको सेमिफाइनलमा प्रवेश गरेको छ । सोमवार काठमाडौंको दशरथ रंगशालामा भएको खेलमा माल्दिभ्सलाई ४–१ गोल अन्तरले हराउँदै घरेलु टोली नेपाल अन्तिम ४ मा पुगेको हो ।  
००००
नेकपा एमाले बागमती प्रदेश अधिवेशन सोमबारदेखि सुरु भएको छ ।  काठमाडौंको भृकुटीमण्डपमा अध्यक्ष केपी शर्मा ओलीले अधिवेशनको उद्घाट गरे । 
बागमती प्रदेशको नेतृत्वका लागि एमालेका नेताहरूबीच निकै प्रतिस्पर्धा देखिएको छ । अध्यक्ष ओली चुनाव हुन नदिने पक्षमा देखिएका छन् । तर, आकांक्षी भने चुनावी प्रतिस्पर्धामा जाने पक्षमा छन् ।