चिकित्सकमाथि कुटपिट गरेको विरोधमा काठमाडौंमा प्रदर्शन भएको छ । मंगलबार काठमाडौंको माइतीघर मण्डलमा चिकित्सकहरूले विरोध प्रदर्शन गरेका हुन् । प्रदर्शनमा काठमाडौंका पाटन, वीर अस्पताल, टिचिङ अस्पताललगायतका चिकित्सकहरू आएका छन् । 

स्वास्थ्यकर्मीहरू प्रदर्शनमा गएपछि विभिन्न अस्पतालमा सेवा प्रभावित भएको छ । डाक्टरहरू आन्दोलनमा गएपछि अस्पताल पुगेका कतिपय बिरामीहरू उपचार नपाई फर्किन बाध्य भएका छन् । 

सोमबार पोखराको मणिपाल अस्पतालमा एक जना बिरामीको मृत्यु भएपछि मृतकका आफन्तहरूले चिकित्सकमाथि कुटपिट गरेका थिए। त्‍यस्तै उनीहरूले अस्पतालमा तोडफोड गरेका थिए।

आइतबार राति लमजुङ जिल्ला अस्पतालमा बेसीशहर नगरपालिका- ७ का वडाध्यक्ष ऋषिराम बस्नेतले डाक्टरमाथि कुटपिट गरेका थिए । 

यसअघि गत भदौ २७ गते हेटौंडाको सञ्चो अस्पतालमा बिरामीका आफन्तले दुई जना डाक्टरमाथि कुटपिट गरेका थिए । 

चिकित्सकहरूले स्वास्थ्यकर्मी तथा स्वास्थ्य संस्थाको सुरक्षा सम्बन्धी पहिलो संशोधन ऐन २०७८ कार्यान्वयनको माग गरेका छन्।