सुनको अवैध तस्करी नियन्त्रणका लागि सुझावसहितको प्रतिवेदन पेश गर्न सरकारले गठन गरेको जाँचबुझ आयोगलाई ३ महिनाभित्र प्रतिवेदन बुझाउने कार्यादेश दिइएको छ । 

आइतवार बसेको मन्त्रिपरिषद् बैठकले ३ महिनाभित्र गृह मन्त्रालयमा प्रतिवेदन बुझाउने गरी उच्च अदालतका पूर्व न्यायाधीश डिल्लीराज आचार्यको अध्यक्षतामा जाँचबुझ आयोग गठन गरेको थियो । 

गृह मन्त्रालयको प्रस्तावमा मन्त्रिपरिषद्ले गठन गरेको आयोगमा नेपाल प्रहरीका पूर्वप्रहरी अतिरिक्त महानिरीक्षक सहकुल थापा तथा पूर्व सहसचिव किशोरजंग कार्की र प्रेमराज जोशी सदस्य छन् । 

३ महिनाभित्र गृहमन्त्रालयाई प्रतिवेदन बुझाउने कार्यादेश दिइएको गृह स्रोतले जानकारी दियो । मंगलवारसम्म आयोगका पदाधिकारीले शपथ ग्रहण गरेर छिट्टै काम शुरू गर्ने गृह स्रोतले बतायो ।

‘आयोगको कार्यालय स्थापनाका लागि आजैदेखि काम शुरू भएको छ, सदस्यहरूको शपथ छिट्टै हुन्छ,’ गृह स्रोतले भन्यो । 

त्रिभुवन विमानस्थल भन्सार कार्यालय बाहिरबाट समातिएको झण्डै ६१ केजी र विद्युतीय चुरोट (भेप्स)मार्फत आएको सुन तस्करी छानबिनका लागि आयोग गठन गर्ने सहमति दलहरूबीच भएको थियो । 

प्रमुख दलहरूबीच भदौ ५ गते भएको सहमतिबमोजिम सरकारले आइतवार आयोग गठन गरेको थियो ।