१९औँ एसियाली खेलकुदअन्तर्गत पुरुष क्रिकेटको क्वाटरफाइनलमा भारतविरुद्ध २ सय ३ रनको लक्ष्य पछ्याएको नेपाल दबाबमा देखिएको छ। १६ ओभरको खेल सकिँदा नेपालले ६ विकेट गुमाएको छ । 

छैटौं विकेटमा रूपमा नेपालले सन्दीप जोरालाई गुमाएको छ । १२ बल खेलेका उनले २९ रन बनाए । 

नेपाल १४० रन बनाएर खेलिरहेको छ । अहिले सोमपाल कामी र गुल्सन झा क्रिजमा छन् । 

यसअघि नेपालका दीपेन्द्र सिंह ऐरी व्यक्तिगत ३२ रन बनाएर आउट भए । १५ बल खेलेका उनले चार छक्का प्रहार गरे । यसअघि नेपालका कुशल भुर्तेल २८, कुशल मल्ल २९ र आसिफ शेख १० रन बनाएर आउट भएका थिए ।  कप्तान रोहित पौडेलले ३ रन मात्र जोड्न सके।

यसअघि टस जितेर पहिले ब्याटिङ रोजेको भारतले निर्धारित २० ओभरमा चार विकेट गुमाएर २०२ रन बनाएको थियो । 

भारतका लागि यसश्वी जैसवालले सर्वाधिक सय बनाए । ४९ बल खेलेका उनी १०० रन बनाएर आउट भए । उनलाई दीपेन्द्र सिंह ऐरीले आउट गरेका थिए । दीपन्द्रले दुई विकेट लिए । दीपेन्द्रले कप्तान रितुराज गायकवाडको विकेट लिएका थिए । 

यस्तै भारतका लागि रिंकु सिंहले ३७ रन बनाए भने शिवम दुवे र रुतुराज गायकवाडले समान २५ रन बनाए । 

चार बल खेलेका जितेश शर्मा ५ रन बनाएर आउट भए भने १० बल खेलेका तिलक वर्मा २ रनमै आउट भए । 

नेपालका लागि दीपेन्द्रले दुई विकेट लिँदा सन्दीप लामिछाने र सोमपाल कामीले समान एक/एक विकेट लिए । 

नेपालविरुद्ध खेल्न भारतले दोस्रो रोजाईको टोली पठाएको छ । भारतीय टोलीमा इन्डियन प्रिमियर लिग (आइपीएल) मा सानदार प्रदर्शन गर्दै आएका खेलाडी छन् । 

नेपाल समूह चरणमा मंगोलिया र माल्दिभ्सलाई हराउँदै अन्तिम आठमा पुगेको हो । भारत भने सिधै क्वार्टरफाइनल खेल्न लागेको हो ।​ आजको विजेता टोली सेमिफाइनल पुग्नेछ । 

नेपालले टी-२० आईमा भारतसँग पहिलो पटक खेल्न लागेको हो। ओडीआईमा भने अघिल्लो महिना एसिया कपमा भारत र पाकिस्तानसँग खेलेको थियो ।