नेकपा (एमाले) बुटवल उपमहानगर कमिटीले मंगलबार बुटवल उपमहानगरपालिकाका नगर प्रमुख (मेयर) खेलराज पाण्डेयलाई २४ बुँदे ज्ञापनपत्र बुझाएको छ । मेयर पाण्डेयले राजनीतिक प्रतिशोधका आधारमा अघिल्लो नेतृत्वले अघि सारेका दर्जन बढी योजना अलपत्र पार्ने काम गरेको र बुटवलको योजनाबद्ध तथा दीर्घकालीन विकासको अवधारणालाई बेवास्ता गरेको भन्दै आपत्ति जनाएको छ । 

नेतृत्वको पूर्वाग्रहपूर्ण सोचका कारण शिवनगर सामुदायिक वन क्षेत्रमा निर्माण भई सञ्चालनमा आएको नन्दनी गौशाला बन्द भएको भन्दै तत्काल सञ्चालनमा ल्याई छाडा चौपाया व्यवस्थापन गर्न एमालले माग गरेको छ । 

भूमि कर शुल्कमा व्यापक सहुलियत र राहत प्रदान गर्न तथा भूउपयोग योजनाको पुनरावलोकन गर्न, अव्यवस्थित बसोबास, भूमिहिन तथा सुकुम्बासीहरूको समस्या समाधानका लागि ठोस पहलकदमी लिन एमालेको माग छ ।

ज्ञापनपत्र बुझाएपछि पार्टी कार्यालयमा पत्रकार सम्मेलन गर्दै एमाले नगर अध्यक्ष किसन ज्ञवालीले मेयर पाण्डेयमा एमाले फोबिया हाबी भएको र उनका व्यवहार स्वेच्छाचारी र निरंकुश बन्दै गएको आरोप लगाए । 

मेयर पाण्डेयबाट कर्मचारीमाथि अपमानजनक र दुव्र्यवहार भएको भन्दै यस्ता गतिविधि रोक्न ज्ञवालीले आग्रह गरे । एमाले नगर सचिव मेघराज भट्टराईले विधि, पद्धति र प्रणाली कुल्चेर मेयर पाण्डेयले राजनीतिक पुर्वाग्रहका आधारमा बुटवलको विकासमा असर पर्नेगरी अघि बढेकाले यस्तो गतिविधि नसच्याए एमाले कडा ढंगले प्रस्तुत हुने चेतावनी दिए ।

पाण्डेयले सत्ता गठबन्धनको तर्फबाट नेपाली कांग्रेसका उम्मेदवार भएर मेयरको चुनाव जितेका हुन् ।