जाजरकोट भूकम्प: सरकारले सच्यायो मृतकको संख्या, ज्यान गुमाउनेमा महिला र बालबालिका धेरै

जाजरकोट भूकम्पमा ज्यान गुमाउनेमध्ये आधा बढी बालबालिका रहेका छन् । नेपाल प्रहरीले उपलब्ध गराएको तथ्याङ्क अनुसार कात्तिक १७ गते राति गएको भूकम्पबाट मृत्यु भएका १५३ मध्ये ७८ बालबालिका छन् ।

जाजरकोटमा ५० र रुकुम पश्चिममा २८ जना बालबालिकाको मृत्यु भएको जाजरकोटका प्रहरी प्रमुख प्रहरी नायब उपरीक्षक सन्तोष रोकाले जानकारी दिए ।

उनका अनुसार दुवै जिल्लामा गरी मृत्यु हुने आधा बढी बालबालिका छन् । जाजरकोटमा मृत्यु भएका १०१ मध्ये बालक २७ र बालिका २३ जना रहेको रोकाले बताए । 

रुकुम पश्चिममा भूकम्पमा परी ५२ जनाको मृत्यु भएकामा २८ बालबालिकाले रहेका जिल्ला प्रहरी प्रमुख नमराज भट्टराइले जानकारी दिए । उनले भने, ‘रुकुम पश्चिममा भूकम्पमा मृत्यु भएकामध्ये अधिकांश बालबालिका छन् । दुई जना १० महिनाका बालबालिकालेसमेत ज्यान गुमाएका छन् ।’

मृत्यु हुनेमा महिला धेरै

भूकम्पमा परी मृत्यु हुनेमा बालबालिकापछि महिला धेरै रहेका प्रहरीले जनाएको छ । प्रहरीका अनुसार जाजरकोटमा मृत्यु भएका १०१ मध्ये ५६ जना महिला र ४५ जना पुरुष छन् । 

भूकम्पबाट मृत्यु हुनेहरूको संख्या पनि केही घटेको छ । यसअघि भूकम्पमा परी कूल १५७ रहेको भनिएकोमा हाल उक्त संख्या १५३ यकिन भएको हो । 

नलगाड नगरपालिकामा घर भएर भेरी नगरपालिकास्थित खलंगा बजारमा मृत्यु भएकाहरूको नाम दोहोरो परेकोले संख्या कम भएको जिल्ला प्रहरी कार्यालय जाजरकोटले जनाएको छ ।

प्रहरीका अनुसार भेरी नगरपालिका र नलगाड नगरपालिकामा दोहोरो पर्दा १०५ जना मृतक संख्या हुन गएकोमा वास्तविक मृतक संख्या १०१ जना मात्रै रहेको प्रहरीले जनाएको छ ।