सावित्रा मृत्यु प्रकरणः न्याय माग्दै परिवार पुग्यो जिल्ला प्रशासन

सुत्केरी अवस्थामा मृत्यु भएकी रुपन्देहीको सियारी गाउँपालिका वडा नम्बर ५ की सावित्रा खरेल खनालको परिवार उपचारमा लापरबाही गर्ने चिकित्सकलाई कारबाही हुनुपर्ने माग लिएर जिल्ला प्रशासन कार्यालय, रुपन्देही पुगेको छ ।

त्यहाँ पुगेर महेश खनालले प्रमुख जिल्ला अधिकारी (प्रजिअ) गणेश अर्याललाई बिहीवार ज्ञापनपत्र बुझाएका हुन् ।

भैरहवास्थित युनिर्भसल कलेज अफ मेडिकल साइन्स (यूसीएमएस) अस्पतालमा ज्ञापनपत्र बुझाएर बैठकमा बस्दा बेवास्ता गरिएकाले प्रजिअसम्म पुग्नु परेको परिवारको भनाइ छ । 

‘अस्पतालका गुनासो सुन्ने अधिकृत सुशील गुरुङ र तेज केसीले प्रहरी प्रशासनको दबाबमा हाम्रा जायज मागप्रति वेवास्ता गरेकाले प्रशासनमा निवेदन दिनुपरेको हो,’ मृतकका जेठाजु महेश खनालले भने ।

ज्ञापनपत्र बुझदै प्रजिअ अर्यालले घटना कानूनी रुपमा अघि बढेकाले त्यसैमा विश्वास गर्न आग्रह गरे । 

असोज ८ गते सुत्केरी हुन यूसीएमएस भर्ना भएकी सावित्राको कार्तिक २ गते काठमाडौंमा मृत्यु भएको थियो । यूसीसएमएसमा डाक्टरको लापरबाहीले सुत्केरीको मृत्यु हुने अवस्था आएको भन्दै परिवार आन्दोलित छ । 

३३ वर्षीया सावित्राको दुई वर्षअघि सुरज खनालसँग विवाह भएको थियो । उनी सियारी वडा नम्बर ५ को वडा कार्यालयमा कम्प्युटर अधिकृतको रुपमा कार्यरत थिइन् ।

उपचारमा ५० लाख रुपैयाँ खर्च गर्दा पनि सावित्राको ज्यान बचाउन नसकिएकोमा परिवार दुःखी छन् । आगामी दिनमा अस्पतालमा चिकित्सकको गल्तीले सावित्राको जस्तो कसैको ज्यान नजाओस् भनेर आफूहरू आन्दोलित भएको पीडित परिवारले बताउने गरेका छन् । 

६ जना डाक्टरले गरेको अप्रेसन भएन सफल, परिवारको आरोप– डाक्टरको चरम लापरबाही भयो