देउवाको गृहजिल्लाबाट ओलीको भविष्यवाणी– खुट्टा नभएको सरकार आफैं ढल्छ

नेकपा (एमाले)का अध्यक्ष केपी शर्मा ओलीले वर्तमान सरकार जुनसुकै बेला ढल्न सक्ने टिप्पणी गरेका छन् । झुलाघाट-चिवाभञ्ज्याङ समृद्धिका लागि संकल्प यात्राअन्तर्गत शुक्रबार डडेलधुराको अमरगढीमा आयोजित सभालाई सम्बोधन गर्दै अध्यक्ष ओलीले सरकारको जग नै कमजोर भएकोले जुनसुकै बेला ढल्न सक्ने टिप्पणी गरेका हुन् । डडेलधुरा नेपाली कांग्रेसका सभापति शेरबहादुर देउवाको गृहजिल्लासमेत हो ।

विभिन्न कारणले देश समस्या परेको उनको भनाइ थियो । 'कर्मचारीलाई तलब खुवाउन समस्या परिरहेको छ । उद्योगहरू बन्द हुँदै गएका छन् । देशलाई अब बढी बर्वाद हुन दिनु हुँदैन,' उनले भने, 'यो सरकार कसैले ढाल्नु पर्दैन । आफैं हल्लिरहेको छ । यो खुट्टा भएको सरकार नै होइन । छेस्का ठड्याएर बनाइएको छ । यो आफैं ढल्न पनि सक्छ ।' 

राजतन्त्रका पक्षमा भइरहेको आन्दोलनलाई लक्षित गर्दै उनले देश अब पछाडि फर्किन नसक्ने ठोकुवा गरे ।  'प्रतिगामी तत्वहरू १५ वर्षअघि मरेको राजतन्त्रको चिहान खनेर फेरि ल्याउँछु भनेर कुदेका छन् । भूतप्रेतवादी तत्वहरू सक्रिय भएका छन्,' उनले भने, 'देश अब पछाडि फर्किन सक्दैन, अब अगाडि बढ्छ ।'