विराटनगर महानगरमा स्थानीयले लगाए ताला, यस्तो छ कारण

विराटनगर महानगरपालिकाको कार्यालयमा स्थानीय बासिन्दाले तालाबन्दी गरेका छन् ।

विराटनगर– ७ सातघुम्तीको कवाडी गोदाममा आगलागी नियन्त्रणका लागि महानगरले दमकल ढिलो पठाएको भन्दै उनीहरूले महानगरमा तालाबन्दी गरेका हुन् ।​

बुधवार दिउँसो भएको आगलागीमा तीन जनाको मृत्यु भएको थियो । ३ जना घाइतेको काठमाडौंको कीर्तिपुरस्थित बर्न अस्पतालमा उपचार भइरहेको छ ।

आगलागीको खबर तत्कालै महानगरपालिकालाई दिएको भए पनि ४५ मिनेटपछि मात्रै दमकल पठाएको उनीहरूको आरोप छ ।

४५ मिनेट पछाडि घटनास्थलमा पुगेको दमकलमा पानी नभरी पठाएको भन्दै बिहीवार बिहानैदेखि स्थानीय आक्रोशित बनेका हुन् । एम्बुलेन्ससमेत समयमा महानगरपालिकाले नपठाएको स्थानीयले आरोप लगाएका छन् ।

आगलागीमा परेर विराटनगर–७ का ३२ वर्षीय दीपक मण्डल र अर्का एक जना महिलाको बुधवार नै मृत्यु भएको थियो ।

काठमाडौंको कीर्तिपुरस्थित बर्न अस्पतालमा उपचारका क्रममा विराटनगर ६ की सुनिता कामतको गए राति मृत्यु भएको मोरङ प्रहरीका प्रवक्ता डीएसपी रञ्जनकुमार दाहालले जानकारी दिए ।

एक जनाको जलेर मृत्यु भएको अवस्थामा घटनास्थलमै शव फेला परेको थियो । 

त्यो शव विराटनगर ६ कै ५५ वर्षीया सुशीला पासवनको रहेको खुलेको छ । यसअघि प्रहरीले पासवान घाइते भएको बताएको थियो । तर ती घाइते सुनिता कामत रहेको पुष्टि भएको छ ।

घाइते अवस्थामा नेपाली सेनाको हेलिकप्टरबाट काठमाडौं लगिएका चार जनामध्ये कामतको मृत्यु भएको हो । अन्य तीन घाइतेको उपचार भइरहेको छ ।