खानेपानीको क्षेत्रमा ३ दशक लामो अनुभव बटुलेका गौतम बने महसुल निर्धारण आयोगको अध्यक्ष

सरकारले खानेपानी महसुल निर्धारण आयोगको अध्यक्षमा रुद्रप्रसाद गौतमलाई नियुक्त गरेको छ ।

नेपाल सरकार मन्त्रिपरिषद्‌को बिहीवारको बैठकले गौतमलाई चार वर्षका लागि आयोगको अध्यक्षमा नियुक्त गरेको सरकारकी प्रवक्ता सञ्चार तथा सूचना प्रविधि मन्त्री रेखा शर्माले जानकारी दिइन् । ​

देशभरको खानेपानी र सरसफाइको महसुल निर्धारणको जिम्मा पाएको आयोगको दुई सदस्यमा यशोदा कार्की र कुलभूषण शर्मा नियुक्त भएका छन् ।

यसअघि कार्यकर्ता भर्तीको केन्द्र बनेको महसुल निर्धारण आयोगमा सरकारले पहिलोपटक सम्बन्धित क्षेत्रको विज्ञ व्यक्ति नियुक्त गरेको छ ।

आयोगको अध्यक्षमा नियुक्त भएका गौतमले ३० वर्ष ललितपुर महानगरपालिकामा खानेपानी र सरसफाइको क्षेत्रमा काम गरेका थिए । महानगनरपालिकाको हेडअर्फ डिमार्टमेन्ट रहिसकेका गौतमले केही समय अगाडि मात्र अवकाश पाएका थिए । 

हाल काठमाडौं उपत्यका मेयर्र फोरमको प्रमुख कार्यकारी अधिकृत (सीइओ) रहेका गौतमले काठमाडौं उपत्यका खानेपानी लिमिटेड (केयूकेएल)मा प्रबन्ध निर्देशनको रुपमा काम गरेका थिए ।

खुला प्रतिस्पर्धाबाट म्यानेजरको रुपमा समेत गरी उनले केयूकेएलमा दश वर्ष काम गरेका छन् । खानेपानी संस्थान फुटेर बनेको काठमाडौं भ्याली व्यवस्थापन बोर्डमा पनि संस्थापको रुपमा उनले काम गरेका थिए । 

इन्जिनियर गौतमले मेलम्ची खानेपानीको व्यवस्थापनको विषयमा पनि काम गरेका थिए । ‘अहिलेसम्म खानेपानी महसुल निर्धारण आयोग कामकाजी बनेको थिएन, पहिलो पटक व्यावसायिक र विज्ञ व्यक्ति नियुक्त भए पनि यसले गति लिने अपेक्षा गरेका छौं’ खानेपानी तथा सरसफाइ मन्त्रालय स्रोतले भन्यो ।

खानेपानी संस्थाले गरेको मूल्य प्रस्ताव र पानीको गुणस्तर हेरेर आयोगले मूल्य निर्धारण गर्ने गर्दछ । देशभर खानेपानीको गुणस्तरको अनुगमनको जिम्मा पनि समितिलाई दिइएको छ ।