पहिचानवादीको नाममा वितण्डा मच्चाउन खोज्नेलाई हामीले सामना गर्नु नपरोस् : ओली

नेकपा एमालेका अध्यक्ष केपी शर्मा ओलीले पहिचानवादीको नाममा केही तत्वले कोशी प्रदेशमा वितण्डा मच्चाउन खोजेको आरोप लगाएका छन् ।

एमालेको संकल्प यात्रालाई अवरोध सृजना गरिए सामना गर्ने उनले चेतावनी दिए । 

झुलाघाट–चिवाभञ्याङ मध्यपहाडी यात्राको शिलशिलामा बिहीवार पर्वतको कुश्मामा आयोजित कार्यक्रममा ओलीले नेपालमा अशान्ति मच्चाउने तत्वले पहिचानका नाममा वितण्डा मच्चाउन खोजेको आरोप लगाएका हुन् । ‘कोशी प्रदेशमा सबैको साझा नाम राखियो भनेर केही तत्वहरू वितण्डा मच्चाउन खोजिरहेका छन् ।

विदेशबाट सञ्चालितहरूले नेपालमा एकता, शान्ति हुन नदिने, अशान्ति मच्चाउने र देशलाई असहज स्थितिमा पारेर तत्व लागिरहेका छन्’ ओलीले भने, ‘झुलाघाट शुरू भएको हाम्रो यात्रालाई चिवाभन्ज्याङ दिँदैनौं भनेका छन्, हामीलाई कसले रोक्ने हो ? सामना गर्नु नपरोस् ।’ 

माओवादी सशस्त्र युद्धको समेत सामना गरिएको भन्दै ओलीले पहिचानवादीका नाममा केही उफ्रिँदैमा फरक नपर्ने बताए । ‘जनयुद्धका नाममा कत्राकत्राको भाइफुट्टी समाप्त भयो भने पहिचानको नाममा ४ जना केटाहरू उफ्रेर केही हुँदैन’ ओलीले भने ।