संसद्‌मा एमालेले भन्यो - प्रधानमन्त्री हराउनु भयो, खोज्नुपर्‍यो सभामुख महोदय !

प्रमुख प्रतिपक्षी दल नेकपा एमालेले प्रतिनिधि सभाका  सभामुखको पटक-पटकको रुलिङलाई प्रधानमन्त्रीले बेवास्ता गरेको भन्दै आपत्ति जनाएको छ । 

शुक्रवार बसेको प्रतिनिधि सभा बैठकको आकस्मिक समयमा एमाले सांसद सूर्य थापाले संसद्‌मा उपस्थित नभएका प्रधानमन्त्रीलाई खोज्न सभामुखको ध्यानाकर्षण गराएका हुन् ।

‘फागुन ६ गतेदेखि संसद्‌मा उठेका विषयमा जवाफ दिन सभामुखले पटक-पटक रूलिङ भएको छ । यसअघिको बैठकमा सभामुखज्यूले आगामी बैठकमा प्रधानमन्त्रीलाई जवाफ दिन​ रुलिङ गर्नुभएको थियो । प्रधानमन्त्रीज्यू छोरीको नगरपालिकामा हुनुहुन्छ भन्ने मिडियाबाट थाहा पाइयो’, थापाले भने, ‘प्रधानमन्त्री र मन्त्रीजीको खोजी गर्नुपर्‍यो सभामुख महोदय । प्रधानमन्त्रीको खोजीका लागि संसद्‌ र समितिले बनाउनु पर्ने हो के हो ।​'

ललितपुरको बालकुमारीमा पुस १३ गते भएको घटनामा छानबिन आयोगले दोषी ठहर्‍याएका भौतिक पूर्वाधार मन्त्री प्रकाश ज्वाला, टेरामक्स प्रकरणमा अख्तियारमा बयान दिएका स्वास्थ्य मन्त्री मोहन बस्नेत र पुरातात्त्विक क्षेत्र रामग्रामलाई व्यक्तिको जिम्मा लगाउन खोज्ने संस्कृति मन्त्री सुदन किराँतीको राजीनामा माग्दै एमालेले संसद्‌मा प्रधानमन्त्रीको जवाफ माग्दै आएको छ ।