भागबन्डा मिलाउन कार्यदल बैठक बस्दै, तानातानमा गृह मन्त्रालय

मन्त्रालय भागबन्डामा सहमति जुटाउन सत्ता गठबन्धनले बनाएको कार्यदलको बैठक मंगलवार बस्दैछ ।

सत्तासाझेदार चार दल नेकपा माओवादी केन्द्र, नेकपा एमाले, रास्वपा र जसपाका नेता सम्मिलित कार्यदलको बैठक बालुवाटारमा बस्न लागेको हो ।

कार्यदलमा एमाले महासचिव शंकर पोखरेल, माओवादी उपमहासचिव वर्षमान पुन, रास्वपाका स्वर्णिम वाग्ले र जसपाका राजेन्द्र श्रेष्ठ छन् । 

कार्यदलले सहमति जुटाएर शीर्ष नेतालाई प्रतिवेदन पेश गरेपछि मन्त्रिपरिषद्लाई पूर्णता दिने नेताहरूले बताएका छन् । मन्त्रालयको विशेषताको आधारमा वर्गीकरण गर्ने चार दलबीच सहमति भएको थियो ।

गृहमन्त्रालय कसले लिने भन्नेमा सहमति जुट्न सकेको छैन । माओवादी र रास्वपाले गृह मन्त्रालयमा दावी गरिरहेका छन् । 

गृह आफैले राखेर अर्थ मन्त्रालय एमालेलाई दिने प्रधानमन्त्रीको चाहना रहेको माओवादी स्रोतको भनाइ छ । भौतिक पूर्वाधार लगायत अन्य रोजेको मन्त्रालय लिन माओवादी र एमालेले रास्वपासँग आग्रह गरेका छन् ।

२०७९ पुस ११ गते रास्वपा सभापति रवि लामिछाने गृह र उपप्रधानमन्त्री सहित सरकारमा सहभागी भएका थिए ।

नागरिकता विवादमा सर्वोच्च अदालतले सांसद पद बदर गरिदिएपछि उनको पद गएको थियो । रविले गृह मन्त्रालय लिएर आफै सरकारमा जान लागेका छन् । 

कांग्रेससँगको गठबन्धन तोड्दै प्रधानमन्त्री पुष्पकमल दाहाल प्रचण्डले एमाले, रास्वपा लगायतसँग सोमवार नयाँ गठबन्धन बनाएका थिए ।

सोमवार तीन जना विनाविभागीय मन्त्रीले शपथ लिएका थिए ।