सचिवहरूसामु प्रधानमन्त्रीको गुनासो– सियोसमेत बाहिरबाट ल्याउनु परेपछि मुलुक कसरी बन्छ !

प्रधानमन्त्री केपी शर्मा ओलीले संघीय मन्त्रालयमा काम गर्ने सबै सचिवहरूलाई आत्मनिर्भरमा केन्द्रित हुन निर्देशन दिएका छन् । 

प्रधानमन्त्री तथा मन्त्रिपरिषद्को कार्यालयमा बिहीबार अपरान्ह सचिवहरूलाई डाकेर ओलीले यस्तो निर्देशन दिएका हुन् ।

विदेशबाट आयात भएका सामानमा मात्रै भर पर्ने प्रवृत्तिलाई निरुत्साहित गरी देशभित्रै उत्पादन हुने वस्तुको प्रयोगमा केन्द्रित रहने गरी आवश्यक कार्यसम्पादन गर्न उनले निर्देशन दिए । 

‘हामी त यस्तो भयौं कि बिहान उठेदेखि सुत्ने बेलासम्म विदेशबाटै आयात भएका बस्तुमा भर पर्ने भयौं, हाम्रो आन्तरिक उत्पादन खै,’ प्रधानमन्त्री ओलीले बैठकमा दिएको निर्देशन उद्धृत गर्दै एक सचिवले भने, ‘कृषिप्रधान देश रे ! तरकारीसमेत विदेशबाट आउँछन् । यो पाराले अब हुँदैन । आन्तरिक उत्पादनमूखी योजना बनाउन जोड दिनुपर्यो ।’ 

प्रधानमन्त्री ओलीले ढाकाटोपी सिलाउने सियोसमेत विदेशबाट आयात हुने भएपछि मुलुक कसरी बन्छ ? भनेर सचिवहरूसँग प्रश्न गरेका थिए । उनले बैठकमा भने, ‘हामीले आफ्ना उत्पादनलाई छोड्यौं, अहिले सुपरमार्केटमा गयौं भने हाम्रा सागपातबाहेक ९९ प्रतिशत सामान विदेशका छन् । हामी अब आफ्नै उत्पादनमा कसरी जोड दिने ? जबसम्म हामीसँग भएका स्रोत–साधनको उपयोग गर्न सक्दैनौं र आत्मनिर्भर हुन सकेनौं भने मुलुकको विकास हुन सक्दैन ।’ 

प्रधानमन्त्री ओलीले मुलुक समृद्ध हुन पहिला आत्मनिर्भर हुनुपर्नेमा जोड दिए । आगामी पाँच वर्षमा शिक्षा, स्वास्थ्य, खाद्यान्न र खानेपानीजस्ता आधारभूत आवश्यकता सर्वसाधारणले सजिलै उपभोग गर्न पाउने गरी काम गर्न सचिवहरूलाई निर्देशन दिए ।

उनले एक र अर्को मन्त्रालयको समन्वयमा रहेर काम गर्न निर्देशन दिएका थिए । 

‘तपाईंहरू जहाँ हुनुहुन्छ, त्यही बसेर यस्तो काम गर्नुस्, सरकारको लक्ष्य भेट्ने गरी काम गर्नुस्,’ उनले भने, ‘तपाईंले काम गरेका कारण त्यो संस्थाले तपाईंलाई सधैँ सम्झिरहोस् ।’ 

ओलीले  कुन मन्त्रालयले के गर्यो भन्दा पनि आफ्नो मन्त्रालयको कार्यसम्पादन राम्रोसँग गर्न निर्देशन दिएका थिए । उनले सर्वसाधारणले महसुस हुने गरी काम गर्न सचिवहरूलाई निर्देशन दिएका हुन् ।

उनले सार्वजनिक सेवा प्रवाह, सुशासन र जनतामा विश्वास बढाउने गरी काम गर्न पनि निर्देशन दिएका थिए । 

यस्तै ओलीले राजस्व चुहावट रोकी राजश्व वृद्धिका लागि सरकारको लक्ष्यअनुसार काम गर्न निर्देशन दिए । उनले भ्रष्टाचार नियन्त्रण र सुशासनमा सचिवहरूलाई निर्मम भएर लाग्नसमेत निर्देशन दिए ।