बीपी कोइराला मेमोरियल क्यान्सर अस्पतालका लेखा अधिकृत ६ लाख घुससहित पक्राउ

बीपी कोइराला मेमोरियल क्यान्सर अस्पताल, भरतपुरमा कार्यरत लेखा अधिकृत अमृता कोइराला ६ लाख घुससहित पक्राउ परेकी छन् । 

औषधि आपूर्तिको बिल भुक्तानी दिएवापत् सेवाग्राहीसँग घुस लिँदै गरेको अवस्थामा लेखा अधिकृत कोइरालालाई अख्तियार दुरुपयोग अनुसन्धान आयोगको कार्यालय हेटौंडाबाट खटिएको टोलीले नियन्त्रणमा लिएको हो । 

उनलाई डेढ लाख नगद र चार लाख ५० हजारको चेकसहित भरतपुर महानगरपालिका-४, कटहर चोकबाट नियन्त्रणमा लिइएको अख्तियारका प्रवक्ता नरहरि घिमिरेले जानकारी दिए ।

कोइरालाले औषधि आपूर्तिको बिल भुक्तानी दिएवापत् घुस माग गरेको सूचना आएपछि अख्तियारको टोलीले स्टिङ अपरेसन गरेको थियो ।

यसबारे थप अनुसन्धान भइरहेको प्रवक्ता घिमिरेले बताए ।