घुससहित पक्राउ परेका फुङलिङ नगरपालिकाका इन्जिनियर हुसैनविरुद्ध मुद्दा दायर

अख्तियार दुरुपयोग अनुसन्धान आयोगले ताप्लेजुङको फुङलिङ नगरपालिका इन्जिनियर (अधिकृत स्तर छैटौं)का मो. अख्तर हुसैनविरुद्ध भ्रष्टाचार मुद्दा दायर गरेको छ ।​​

सेवाग्राहीसँग लिएको १ लाख रुपैयाँ घुससहित पक्राउ परेका उनीविरुद्ध मंगलबार विशेष अदालत काठमाडौंमा मुद्दा दायर गरिएको आयोगका प्रवक्ता नरहरि घिमिरेले जानकारी दिए ।

प्रवक्ता घिमिरेका अनुसार इन्जिनियर हुसैनले खेलकुद मैदान निर्माण कार्यमा सेवाग्राहीसँग घुस मागेका थिए ।

गोप्य सूचनाका आधारमा आयोगको कार्यालय इटहरीबाट खटिएको टोलीले हुसैनलाई सेवाग्राहीबाट लिएको १ लाख रुपैयाँ घुससहित पक्राउ गरेको थियो । 

अनुसन्धानका क्रममा उनले खेल मैदान निर्माण कार्य सम्पन्नपश्चात भुक्तानी गर्ने क्रममा सेवाग्राहीसँग घुस लिएको पुष्टि भएको थियो ।

आयोगले उनीलाई कैद सजाय र बिगो बमोजिम जरिवानाको मागदाबी गरेको छ ।