लुम्बिनीका ८ मन्त्रीले पाए १० दिनपछि जिम्मेवारी

लुम्बिनी प्रदेशका ८ जना बिनाविभागीय मन्त्रीको शुक्रबार जिम्मेवारी फाँडबाट भएको छ ।​​

बिनाविभागीय मन्त्री नियुक्त भएको १० दिनपछि उनीहरूले जिम्मेवारी पाएका हुन् । मुख्यमन्त्री चेतनारायण आचार्यले साउन ९ गते नेकपा एमालेबाट ५ र कांग्रेसबाट ४ जना गरी ९ जना बिनाविभागीय मन्त्रीसहित मन्त्रिमण्डल गठन गरेका थिए । 

जसअनुसार आर्थिक मामिला तथा योजना मन्त्रीमा गुल्मीका धनेन्द्र कार्की, सहरी विकास तथा खानेपानी मन्त्रीमा प्युठानका सरोज थापा (रोज राणा), वन तथा वातावरणमा बाँकेका बादशाह कुर्मीले जिम्मेवारी पाएका छन् ।

त्यस्तै  उद्योग, पर्यटन तथा यातायात मन्त्रीमा दाङका प्रचण्डविक्रम न्यौपानेलाई जिम्मेवारी दिइएको छ ।

कांग्रेसले आफ्नो भागमा परेको एउटा मन्त्रालयमा मन्त्री अझै पठाउन सकेको छैन ।

त्यस्तै एमालेबाट भौतिक पूर्वाधार विकास मन्त्रीमा रूपन्देहीका भूमिश्वर ढकाल, कृषि तथा भूमि व्यवस्था मन्त्रीमा गुल्मीका दिनेश पन्थी, स्वास्थ्य मन्त्रीमा पाल्पाका खेम सारू र ऊर्जा जलश्रोत र सिँचाइ मन्त्रीमा दाङकी सीता शर्मा चौधरीले जिम्मेवारी पाएका छन् ।

मुख्यमन्त्री आचार्यले सामाजिक विकास मन्त्रालय, आन्तरिक मामिला तथा कानून मन्त्रालय र महिला तथा बालबालिका तथा जेष्ठ नागरिक मन्त्रालयको जिम्मेवारी आफैंसँग राखेका छन् ।

लुम्बिनीमा साना दलहरू पनि सरकारमा जान इच्छुक । उनीहरुलाई पनि दुई मन्त्रालय दिएर १२ सदस्यीय मन्त्रिमण्डल बनाउने कांग्रेस र एमालेबीच मोटामोटी सहमति छ ।