अल्पमतमा परेका दीर्घ सोडारीले दिए मुख्यमन्त्रीबाट राजीनामा

सुदूरपश्चिम प्रदेश सरकारका मुख्यमन्त्री दीर्घ सोडारीले पदबाट राजीनामा दिएका छन् ।

शुक्रबार बसेको प्रदेशसभा बैठकमा सम्बोधन गर्दै उनले राजीनामा घोषणा गरेका हुन् ।

‘म माथि विश्वास छ भनेरै म विश्वासको मत लिन प्रदेशसभामा फेस गर्न आएको हु तर यहाँ आएर हेर्दा अवस्था विपरीत छ । प्रमुख दल नेपाली काँग्रेस र नेकपा एमाले लगायतका दलले मार्ग प्रशस्त गरी दिन आग्रह गरेका थिए सोही अनुसार मैले मार्ग प्रशस्त गरी दिए,' प्रदेशसभाको बैठकलाई सम्बोधन गर्दै सोडारीले भने ।

सोडारीले राजीनामा घोषणा गरे सँगै सभामुख भीमबहादुर भण्डारीले प्रदेशसभा नियमावली २०८० को नियम ६५ को उपनियम १ बमोजिम बैठकमा प्रस्ताव पेस गर्ने अनुमति पाएर पनि प्रस्ताव पेस नगरिएकाले उक्त प्रस्ताव स्वतः निष्क्रिय भएको घोषणा गरी प्रदेशसभा बैठक स्थगित गरेका छन् । 

मुख्यमन्त्री सोडारीले प्रदेश प्रमुख समक्ष राजीनामा दिएसँगै प्रदेश प्रमुखले नयाँ सरकार गठनका लागी आह्वान गर्नेछन् ।

नेकपा एमाले र नेपाली कांग्रेसको सहमतिअनुसार सुदूरपश्चिम सरकारको नेतृत्व पहिलो चरणमा कांग्रेसले गर्नेछ ।

सोडारीको राजीनामासँगै नेकपा एस केन्द्रदेखि प्रदेशसम्म सरकार बाहिर पुगेको छ ।