सुदूरपश्चिममा नयाँ सरकार गठनका लागि आह्वान, आइतवार साँझसम्म समयसीमा

सुदूरपश्चिम प्रदेशमा नयाँ सरकार गठनका लागि दुई दिन समयसीमा तोकिएको छ ।

प्रदेश प्रमुख नजिर मियाँले आइतवार साँझ ५ बजेसम्ममा नयाँ सरकार गठन गर्न शुक्रवार आह्वान गरेका हुन् ।

मुख्यमन्त्री दीर्घबहादुर सोडारीले शुक्रवार नै राजीनामा दिएसँगै नयाँ सरकार गठनका लागि प्रदेश प्रमुख मियाँले संविधानको धारा १६८ को उपधारा २ बमोजिम आह्वान गरेका छन् ।

शुक्रवार बसेको प्रदेशसभा बैठकमा सम्बोधन गर्दै मुख्यमन्त्री सोडारीले राजीनामा घोषणा थिए । 

नेकपा (एमाले) र नेपाली कांग्रेसको सहमतिअनुसार सुदूरपश्चिम सरकारको नेतृत्व पहिलो चरणमा कांग्रेसले गर्नेछ ।

सोडारीको राजीनामासँगै नेकपा (एकीकृत समाजवादी) केन्द्रदेखि प्रदेशसम्म सरकार बाहिर पुगेको छ ।

यद्यपि नयाँ मुख्यमन्त्रीको टुङ्गो भने लागिसकेको छैन । पूर्वमुख्यमन्त्रीसमेत रहेका कमलबहादुर शाह अहिले पनि कांग्रेसको संसदीय दलका नेता छन् । उनी नै मुख्यमन्त्रीका प्रमुख दाबेदार हुन् ।

उनीबाहेक कांग्रेसकै बहादुरसिंह थापा, दिवानसिंह विष्ट र पार्टी सभापति शेरबहादुर देउवाका भतिजसमेत रहेका प्रकाशबहादुर देउवा पनि मुख्यमन्त्रीका आकांक्षी हुन् । 

कांग्रेसको विधानमा संसदीय दलको नेताले नै सरकारको नेतृत्व गर्ने व्यवस्था रहेकाले शाह नै मुख्यमन्त्री बन्ने प्रबल सम्भावना छ ।