एयर डाइनेस्टी हेलिकप्टर दुर्घटना : छानबिन गर्न ३ सदस्यीय आयोग गठन

बुधबार भएको एयर डाइनेस्टीको हेलिकप्टर दुर्घटनाको छानबिन गर्न सरकारले समिति गठन गरेको छ । 

दुर्घटनापछि बसेको आकस्मिक मन्त्रिपरिषद् बैठकले नेपाली सेनाका वरिष्ठ पाइलट सुवास थापा संयोजक रहेको ३ सदस्यीय आयोग गठन गरेको सञ्चारमन्त्री पृथ्वीसुब्बा गुरुङले जानकारी दिए ।

आयोगको अन्य सदस्यमा तनुजा पोखरेल र विष्णु बस्नेत छन् ।

छानबिनका लागि उक्त समितिलाई ३० दिनको समय दिइने मन्त्री गुरुङले बताए ।

बुधबार दिउँसो भएको दुर्घटनामा क्याप्टेन अरुण मल्लसहित ५ जनाको मृत्यु भएको थियो । मृत्यु भएका पाँचमध्ये चारजना चिनियाँ नागरिक रहेको खुलेको छ । 

प्रहरी केन्द्रीय प्रवक्ता डीआईजी दानबहादुर कार्कीले नागरिक उड्डयन प्राधिकरणलाई उद्धृत गर्दै दिएको जानकारीअनुसार हेलिकप्टरमा पाइलट अरुण मल्लले उडाएका थिए ।

ज्यान गुमाउनेमा पाइलट मल्लसहित चिनियाँ नागरिकहरू जुताद ताङ, जी ली, यियाद ऊ र जेमिङ सी रहेका छन् ।

काठमाडौंबाट रसुवाको स्याफ्रुबेसी उडेको एयर डाइनेस्टीको हेलिकप्टर नुवाकोटको शिवपुरीमा बुधवार दिउँसो दुर्घटनामा परेको हो ।