सामुदायिक विद्यालयले शैक्षिक गुणस्तर वृद्धि गर्नुपर्छ : मुख्यमन्त्री कार्की

कोशी प्रदेश मुख्यमन्त्री हिक्मतकुमार कार्कीले सामुदायिक विद्यालयले शैक्षिक गुणस्तर वृद्धि गर्दै जानुपर्नेमा जोड दिएका छन् ।

धरान उपमहानगरपालिका–१२ स्थित पब्लिक हाई स्कूलको ७८औं वार्षिकोत्सवका अवसरमा आज आयोजित कार्यक्रममा उनले यस्तो बताएका हुन् । सामुदायिक विद्यालयले शैक्षिकस्तर वृद्धि गरे निजी क्षेत्रसँग प्रतिस्पर्धा गर्नसक्ने उनको भनाइ थियो ।

शिक्षा क्षेत्रको समग्र विकास र सुधारका लागि स्थानीय, प्रदेश र सङ्घीय सरकारले समन्वय गरी नीति बनाएर कार्यान्वयन गर्नुपर्नेमा मुख्यमन्त्री कार्कीले जोड दिए ।

शिक्षा क्षेत्रमा लगानी वृद्धि गर्नुपर्ने बताउँदै उनले विद्यालयको विकास र शिक्षा सुधार गर्न प्रदेश सरकारले सहयोग गर्ने प्रतिबद्धता जनाए ।

विद्यालयको स्थापना दिवसको अवसरमा पब्लिक हाई स्कूलद्वारा प्रकाशित ‘पीयूष’ मुखपत्र छैठौं अङ्कको विमोचन गरिएको थियो ।

कार्यक्रममा विद्यालयका प्राध्यापक डा. इन्द्रमोहन झा, विद्यालय अभिभावक सङ्घका अध्यक्ष राजेन्द्र राईलगायत जनप्रतिनिधिको उपस्थिति थियो ।