सरकारी प्रतिनिधिबिनै सुडानको युद्धविराम वार्ता शुरू हुँदै

जेनेभा– सुडानको युद्धविराम वार्ता अमेरिकी मध्यस्थतामा बुधबारदेखि स्विट्जरल्यान्डमा शुरू हुने भएको छ ।

सुडानका लागि अमेरिकी विशेष दूत टम पेरिएलोले विनाशकारी द्वन्द्वबाट तहसनहस भएका सुडानका जनताले अब पर्खन नसक्ने भन्दै वार्ता अघि बढ्ने बताएका छन् । 

सन् २०२३ को अप्रिलदेखि सुडानका वास्तविक शासक अब्देल फतह अल बुरहानको नेतृत्वमा रहेको सेना र उनका पूर्वसहयोगी मोहमद हमदान डग्लोको नेतृत्वमा रहेको अर्धसैनिक र्‍यापिड सपोर्ट फोर्सेज (आरएसएफ)बीच युद्ध चलिरहेको छ ।

अज्ञात स्थानमा बन्द कोठामा हुने वार्ताका लागि आरएसएफको प्रतिनिधिमण्डल स्विट्जरल्यान्डमा छ । तर सरकारनिकट सुडानी सशस्त्र बल (एसएएफ)ले निमन्त्रणा स्वीकार गरेको छैन । यसर्थ सुडानी सरकारबिनै वार्ता हुने भएको हो । 

१० दिनसम्म चल्ने उक्त वार्ताका लागि साउदी अरेबिया र स्विट्जरल्यान्डले संयुक्त रूपमा मध्यस्थता गरेका छन् भने अफ्रिकी सङ्घ, इजिप्ट, संयुक्त अरब इमिरेट्स र संयुक्त राष्ट्रसङ्घ पर्यवेक्षकका रूपमा उपस्थित छन् ।

सुडानमा चलिरहेको हिंसात्मक द्वन्द्वले संसारकै सबैभन्दा खराबमध्ये एक मानिएको मानवीय सङ्कट निम्त्याएको छ ।

यस द्वन्द्वका कारण हरेक पाँच सुडानीमध्ये एकजना आफ्नो घर छोड्न बाध्य भएका छन् भने दशौं हजारको मृत्यु भइसकेको छ । देशभरका दुई करोड ५० लाखभन्दा बढी अर्थात् आधाभन्दा बढी जनसङ्ख्या भोकमरीको चपेटामा परेको छ ।

‘अहिले शान्ति स्थापनाका लागि उपयुक्त समय हो,’ पेरिएलोले मङ्गलबार भने, ‘अहिलेसम्म एसएएफले भाग लिन मानेको छैन । यद्यपि हामी हाम्रा अन्तर्राष्ट्रिय र प्राविधिक साझेदारहरूसँग सुडानका जनतालाई समर्थन गर्न सबै विकल्पहरू खोजी गर्न अघि बढ्नेछौं । सरकारलाई ‘अवसरको फाइदा उठाउन’ आग्रह गर्दछौँ ।’