माओवादीसँग सहमति गर्दा पार्टीमा कारबाहीको कुरा गर्ने ओली हो– माधव नेपाल

नेकपा एकीकृत समाजवादीका अध्यक्ष माधवकुमार नेपालले तत्कालीन विद्रोही माओवादीसँग सहमति गरेबापत केपी शर्मा ओलीले कारबाहीको कुरा गरेको आरोप लगाएका छन् । शान्ति प्रक्रिया शुरू गर्न आफूले धेरै मेहनत गरेको उनले बताए । 

प्रतिनिधिसभामा बुधबार संक्रमणकालीन न्यायसम्बन्धी विधेयकमाथिको छलफलका क्रममा नेता नेपालले माओवादीसँग सहमति गरेबापत ओलीले पार्टीमा कारबाहीको कुरा गरेको बताएका हुन् । 

‘२०६२ सालमा वामदेव गौतम र युवराज ज्ञवालीलाई पठाएर माओवादीसँग १२ बुँदे लिखित सहमति गर्नुभयो । त्यो बेला पार्टी भित्र विवाद भयो । कारबाही गर्नुपर्छ भन्ने कुरा उठ्यो, त्यो कुरा गर्ने अहिलेका प्रधानमन्त्री केपी ओली हो,’ नेपालले भने ।

त्यो बेला नेपाल एमालेको महासचिव थिए ।

अध्यक्ष नेपालले २०६२ मंसिरमा भएको १२ बुँदे सहमति भारतको निर्देशनमा नभई नेपालका दलहरूले स्वविवेकले गरेको दाबी गरे ।