म्यान्मारको सेनाले भन्यो– जुन्टा प्रमुखलाई हिरासतमा लिइएको भन्ने प्रचार अफवाह मात्रै

याङ्गुन–शीर्ष जनरलले जुन्टा प्रमुखलाई हिरासतमा लिएको प्रचार अफवाह मात्र भएको म्यानमारको सेनाले जनाएको छ । उक्त हल्ला सरकारविरोधी समूहद्वारा फैलाइएको प्रचार मात्र भएको सेनाले बुधबार दाबी गरेको हो । चिनियाँ विदेशमन्त्रीको भ्रमणअघि यस्तो हल्ला फैलाइएको सेनाले स्पष्ट पारेको छ । 

जुन्टा प्रमुख मिन आङ ह्लाइङले पछिल्लो समय सैन्य समर्थकबाट सार्वजनिक आलोचनाको सामना गर्नुपरेको छ  । हाल यस क्षेत्रमा सरकारी सेना, जातीय अल्पसङ्ख्यक सशस्त्र समूह र अन्य विपक्षीबीच आपसी द्वन्द्व चलिरहेको छ । 

मङ्गलबार सामाजिक सञ्जालका धेरै पोस्टमा शीर्ष जनरलले जुन्टाको शीर्ष नेतृत्व परिवर्तन गर्ने प्रयासमा राजधानी न्यापितमा सेनाप्रति बफादार सरकार प्रमुख मिनलाई हिरासतमा लिएको दाबी गरिएको थियो । 

उक्त दाबी देशको ‘शान्ति र स्थिरता’मा खलल पार्ने उद्देश्यले गरिएको प्रचार मात्र भएको सरकारले विज्ञप्तिमार्फत जनाएको छ । 

चिनियाँ विदेशमन्त्री वाङ्ग बुधबार म्यान्मारमा मिन आङ ह्लाइङसँग वार्ताका लागि आइपुग्ने कार्यक्रम  छ ।

भ्रमणको उद्देश्य विभिन्न क्षेत्रमा द्विपक्षीय पारस्परिक फाइदाजनक सहयोगलाई दृढ बनाउनु  रहेको जनाइएको छ । चीन जुन्टाको प्रमुख सहयोगी हो ।

पछिल्लो समयमा जातीय सशस्त्र समूहहरूको गठबन्धनले चीनको युन्नान प्रान्तको सीमानामा रहेको उत्तरी शान राज्यको क्षेत्र जुन्टाबाट कब्जा गरेको छ ।

कब्जा गरिएको क्षेत्रमा शान राज्यको लासियो शहरमा सेनाको उत्तरपूर्वी कमान्ड समावेश छ  । जहाँ करिब एक लाख ५० हजार मानिस बसोबास गर्छन् ।

गठबन्धनले ‘विदेशी’ स्रोतबाट ड्रोन र छोटो दूरीका मिसाइललगायत हतियारहरू प्राप्त गरिरहेको मिनले दाबी गरे ।