‘पदका लागि २० महिनामा २ पल्ट बालकोट, २ पटक बूढानीलकण्ठ ! त्यो जनयुद्ध थियो ?’

राष्ट्रिय जनमोर्चाका अध्यक्ष चित्रबहादुर केसीले माओवादी सशस्त्र संघर्षलाई ‘जनयुद्ध’ मान्न नसकिने बताएका छन् । उनले त्यो आन्दोलन उग्र वामपन्थी भड्काव भएको टिप्पणी गरे ।

बुधबार प्रतिनिधिसभामा संक्रमणकालीन न्यायसम्बन्धी विधेयकमाथिको छलफलका क्रममा केसीले माओवादीको उग्र वामपन्थी भड्काव दक्षिणपन्थी भड्कावमा परिणत भएको दाबी गरेका हुन् । 

‘माओवादी आन्दोलनलाई हामीले कहिल्यै जनयुद्ध मानेका थिएनौं, उग्र वामपन्थी भड्काव नै थियो । दक्षिणपन्थी भड्कावमा रूपान्तरित भयो,’ केसीले भने, ‘त्यही कारण हो, २० महिलामा पदको लागि २ पल्ट बालकोट, २ पटक बूढानीलकण्ठ गएको । त्यो जनयुद्ध थियो ?’

माओवादी ‘जनयुद्ध’को अस्तित्व स्वीकार नगरिएको भन्दै माओवादी अध्यक्ष पुष्पकमल दाहाल 'प्रचण्ड'ले गुनासो गरेका थिए ।