स्टन्टका लागि टावर चढेका युट्युबर त्यहीँ फसे, पाँच घण्टा लगाएर उद्धार गरेपछि प्रहरीले दियो चेतावनी

युट्युबमा नाम कमाउने प्रयासमा स्टन्ट गर्न लागेका एक युट्युबरलाई भारतको उत्तर प्रदेशको ग्रेटर नोएडामा पाँच घण्टासम्मको उद्धार अपरेसनपछि सकुशल तल झारिएको छ ।​

एनडीटीभीको रिपोर्टअनुसार निलेश्वर नामका ती युट्युबरले ग्रेटर नोएडाको तिग्री गाउँमा रहेको मोबाइल टावरमा चढेर स्टन्ट गर्ने प्रयास गरेका थिए ।

करिब ८ हजार ९०० सब्सक्राइबर भएको ‘निलेश्वर२२’ नामक युट्युब च्यानलको लागि थप भ्युज बढाउने उद्देश्यले उनले यो खतरनाक स्टन्ट गरेका थिए । स्टन्टको भिडियो तलबाट उनका साथीले खिचिरहेका थिए ।

उनको यो स्टन्टले छिट्टै स्थानीयको ध्यान तान्यो र घटनास्थलमा भीड जम्मा हुन थाल्यो । ठूलो भीड देखेर भिडियो खिचिरहेका उनका साथी भागे । निलेश्वर भने मोबाइल टावरको माथिल्लो भागमा फसे । घटनास्थलमा पुगेको प्रहरीले उनलाई सकुशल उद्धार गर्न ५ घण्टा लगाएको थियो । 

प्रहरीले भ्यूज बढाउने नाममा यस्ता खतरनाक गतिविधिमा संलग्न नहुन सर्वसाधारणलाई आग्रह गरेको छ ।

यो घटना घट्नु केही समयअघि भारतकै पुणेमा अर्को एक जोखिमपूर्ण स्टन्ट गरिएको थियो । एक महिला अग्लो भवनबाट एक पुरुषको हात समाउँदै झुन्डिएकी थिइन् । गत महिना उनीहरूलाई पक्राउ गरिएको थियो । भिडियो खिच्ने व्यक्ति भने घटनास्थलबाट फरार भएका थिए ।

केरलाका युट्युबरको कारभित्र स्विमिङ पुल

केरला निवासी युट्युबर सन्जु टेक्कीले मलयालम फिल्मबाट प्रेरित भएर आफ्नो कारभित्र स्विमिङ पुल बनाउने जोखिमपूर्ण स्टन्ट गरेका थिए । 

उनले कारभित्र टारपोलिनको पाना बिछ्याएर पानी भरे अनि गाडी चलाए । तर पानी ड्राइभरको सिट र इन्जिनमा छिर्न थालेपछि गाडी रोकेर पानी निकाल्न खोज्दा ट्राफिक जाम भयो ।

प्रहरीले युट्युबर र उनका साथीहरूमाथि कडा कारबाही गर्दै गाडीको दर्ता प्रमाणपत्र निलम्बन गरेको छ भने चालकको लाइसेन्स एक वर्षको लागि रद्द गरेको पीटीआईले जनाएको छ ।