पक्राउ पुर्जी जारी भएपछि दुर्गा प्रसाईंको प्रतिक्रिया– ओलीको कार्यकाल राणा शासनजस्तो भयो

व्यवस्था परिवर्तन गर्न भन्दै आन्दोलन गरिरहेका विवादास्पद मेडिकल व्यवसायी दुर्गा प्रसाईंले आफूविरुद्ध प्रधानमन्त्री केपी शर्मा ओलीले प्रतिशोध साँधेर पक्राउ पुर्जी जारी गरेको आरोप लगाएका छन् । सैनिक हिरासतमा बसेर आएको मान्छे प्रहरीसँग नडराउने उनले बताए । 

बुधवार साँझ आफ्नै निवास भक्तपुरमा पत्रकार सम्मेलन गरी प्रसाईंले बिहीवारका लागि सर्लाहीका तय गरिएको कार्यक्रमबाट डराएर सरकारले आफूविरुद्ध पक्राउ पुर्जी जारी गरेको आरोप लगाएका हुन् । 

‘भोलि संविधान दिवसको दिन सर्लाहीको लालबन्दीमा विशाल कार्यक्रम राखेका थियौं, १ लाख मानिस उपस्थित हुने देखेपछि मलाई पक्राउ पुर्जी जारी गरिएको छ,’ प्रसाईंले भने, ‘प्रचण्डको नेतृत्वमा सरकार रहुन्जेल मलाई पक्राउ पुर्जी जारी भएन । केपी ओलीको कार्यकाल राणाकालभन्दा खतरा भयो । बोल्न नपाइने, यही हो लोकतन्त्र ?’ 

प्रहरीको साइबर व्युरोमा परेको उजुरीका आधारमा जिल्ला अदालत काठमाडौंले बुधवार प्रसाईंलाई पक्राउ पुर्जी जारी गरेको थियो । ‘मैले कसैको नाम लिएर बोलेको छैन, प्रतिशोध साँध्न मात्र पक्राउ गर्न लागिएको हो । उपरवालाले यसको हिसाब–किताब गर्छन्,’ उनले भने ।  

प्रसाईंले आफू गणतन्त्रका लागि सैनिक हिरासतमा बसेको भन्दै प्रहरीसँग नडराउने बताए । ‘म डराउँदिन, बलात्कारको आरोप लागेर लगेको भए बेइज्जत हुन्थ्यो । प्रहरीले कति दिन थुन्छ मलाई, बढीमा २४ दिन होइन ? त्यसपछि म आइहाल्छु,’ प्रसाईंले भने । 

उनले जिल्ला अदालतले जारी गरेको पक्राउ पुर्जीविरुद्ध आफू उच्च अदालतमा जानेबारे कानूनी परामर्श गरिरहेको बताए । प्रसाईंका सहयोगीहरूले घर बाहिर प्रहरीले निगरानी बढाएको बताएका छन् ।