श्रेष्ठ अध्यक्ष रहेको नेपाल ब्याडमिन्टन संघ खारेज गरेर नयाँ तदर्थ समिति बनाउन माग [निवेदनसहित]

 रामजी बहादुर श्रेष्ठ अध्यक्ष रहेको भनिएको नेपाल ब्याडमिन्टन संघ खारेज गर्न माग गरिएको छ । संघका पूर्वउपाध्यक्षहरु नरेश बहादुर सिंह, विश्वेस श्रेष्ठ, सुभाष श्रेष्ठ तथा तदर्थ समिति सदस्य ऋषिकेश श्रेष्ठ र सुनिल श्रेष्ठले संघ अवैध भएको जिकिर गर्दै खारेज गरेर नयाँ तदर्थ समिति बनाउन युवा तथा खेलकुदमन्त्री तेजुलाल चौधरीसमक्ष निवेदन दिएका हुन् ।

उनीहरूले मन्त्रालयमा दर्ता गराएको निवेदनमा राष्ट्रिय खेलकुद परिषद्को स्वीकृति विनै श्रेष्ठले अवैधरुपमा निर्वाचन तथा साधारण सभा सम्पन्न गराएको उल्लेख छ। निवेदनअनुसार २०८० जेठ २९ मा परिषद्ले संघको तदर्थ समिति गठन गरेकोमा श्रेष्ठले २०८१ साउन २२ मा निर्वाचन सहितको साधारण सभाका लागि स्वीकृत माग गरेका थिए । तर मापदण्ड पूरा नगरेका कारण परिषद्ले स्वीकृति प्रदान नगरेको निवेदनमा उल्लेख छ । 

‘यसरी रामजी बहादुर श्रेष्ठले आजसम्म पनि राष्ट्रिय खेलकुद परिषदबाट स्वीकृति प्राप्त नगरी अवैध ढङ्गबाट संघ कब्जा गरी राजनैतिक दलको भ्रातृ संगठनको रूपमा सञ्चालन गरिरहेका छन्’, निवेदनमा भनिएको छ, ‘नेपाल ओलम्पिक कमिटीमा सचिवको रूपमा नेपाल ब्याडमिन्टन संघकातर्फबाट प्रतिनिधित्व गर्दै आएका उनले राष्ट्रिय खेलकुद परिषद्को कुनै लिखित निर्देशन समेतलाई बेवास्ता गरी आफूखुसी ढङ्गबाट संघ सञ्चालन गरिरहेको र मनोमानी ढंगले निर्वाचन गरेको तर राष्ट्रिय खेलकुद परिषद्ले मान्यता नदिएको हुनाले ब्याडमिन्टन खेल र खेलाडी संरक्षण गर्नका लागि तत्काल श्रेष्ठ अध्यक्ष रहेको भनिएको अवैध नेपाल ब्याडमिन्टन संघ खारेज गरी नयाँ तदर्थ समिति बनाउन जोडदार माग गर्दछौँ ।’

 साथै परिषद्को स्वीकृति विना खेलाडीहरूलाई विदेशमा खेल्न पठाउने नाममा अवैध संघकै पदाधिकारीहरू महिनैपिच्छे विदेश भ्रमणमा गइरहेको भन्दै यो कार्य रोक्न समेत सम्बन्धित निकायलाई निर्देशन दिन अनुरोध गरिएको छ ।

संघको उल्लेखित समस्याहरूको तुरुन्त समाधान गरी खेल र खेलाडीको भविष्य सुनिश्चित गर्नका लागि भूमिका खेल्नसमेत मन्त्रीलाई आग्रह गरिएको छ ।