चीनको सबैभन्दा ठूलो विद्युतीय गाडी निर्माता बीवाईडी अस्ट्रेलियामा पनि टेस्लालाई पछाडि पार्दै सबैभन्दा बढी बिक्री हुने ईभी बनेको छ ।

अस्ट्रेलियाको अटोमोबाइल्स बजारमा ऐतिहासिक परवर्तन ल्याउँदै बीवाईडीले अमेरिकी कम्पनी टेस्लालाई पछाडि पारेको हो ।  

टेस्लाको वर्चस्वलाई तोड्दै बीवाईडीको नयाँ मोडल ‘सिलियन ७’ बजारमा आएको पहिलो महिनामै अस्ट्रेलियाको सबैभन्दा बढी बिक्री हुने विद्युतीय गाडी बन्न सफल भएको हो । 

बीवाईडीले लामो समयदेखि शीर्ष स्थानमा रहेको टेस्लाको ‘मोडेल वाई’लाई पछाडि पारेको छ । 

सन् २०२४ को बिक्रीको आँकडाअनुसार, बीवाईडीको ‘सिलियन ७’ले आफ्नो पहिलो महिनामा १ हजार ४४५ युनिट बिक्री गरेर बजारमा नयाँ तरंग सिर्जना गरेको छ । 

यसको तुलनामा टेस्लाको मोडेल वाईले सोही अवधिमा १ हजार १६७ युनिट मात्र बिक्री गर्न सक्यो । यो एक साधारण बिक्रीको संख्या मात्र नभई अस्ट्रेलियाली बजारमा टेस्लाको एकाधिकार समाप्त हुँदै गएको संकेतका रूपमा पनि हेरिएको छ ।

चिनियाँ विद्युतीय गाडीले पहिलोपटक अस्ट्रेलियाको बिक्री तालिकामा शीर्ष स्थान हासिल गरेको हो । 

मे महिनामा ८० हजार अस्ट्रेलियन डलरभन्दा कम मूल्यको मध्यम आकारको पारिवारिक गाडीको श्रेणीमा पनि पहिलो नम्बरमा बीवाईडीको सिलियन पर्न गएको छ । यसले पेट्रोल र डिजेल जस्ता परम्परागत इन्धनबाट चल्ने गाडीलाई समेत पछि पार्न सफल भएको छ । 

यसका साथै समग्रमा बीवाईडी अस्ट्रेलियामा दशौं सबैभन्दा बढी बिक्री हुने सवारी साधन बनेको छ ।  

आकर्षक मूल्य र उत्कृष्ट सुविधाका कारण बीवाईडीले विश्वबजारमा उत्कृष्ट प्रदर्शन गरिरहेको हो । कम्पनीले उपभोक्ताहरूलाई कम मूल्यमा उच्च गुणस्तर र आधुनिक प्रविधि प्रदान गरेर बजारमा आफ्नो बलियो स्थान बनाएको छ । 

सिलियनका २ मोडल बजारमा उपलब्ध रहेका छन् । जसमध्ये सिलियन डाइनामिक मोडलको  मूल्य ४९ हजार ८९० अस्ट्रेलियन डलर बाट शुरू हुन्छ । यसमा ७१.८ किलोवाटको ब्याट्री छ । जसले एकपटकको चार्जमा ४२० किलोमिटरको यात्रा दूरी प्रदान गर्दछ ।

अर्को प्रिमियम मोडलको मूल्य ५४ हजार ८९० अस्ट्रेलियन डलरबाट शुरू हुन्छ । यसमा ८७.० किलोवाटको ठूलो ब्याट्री छ । जसले ५०० किलोमिटरको आकर्षक यात्रा दूरी प्रदान गर्ने टेस्लाको दाबी छ ।