नेपालमा इन्टेलिजेन्ट प्रिमियम इलेक्ट्रिक अर्बन एसयूभी ‘एमजी आईएम ६’ सार्वजनिक गरिएको छ । 

मोरिस गराजेज (एमजी)का नेपालका आधिकारिक वितरक प्यारामाउन्ट मोटर्सले बिहीबार काठमाडौंमा विशेष कार्यक्रम आयोजना गरी यस नयाँ मोडेलको भव्य सार्वजनिक अनावरण गरेको हो ।

‘एमजी आईएम ६’ नेपालमा पहिलो पटक सार्वजनिक भएको इन्टेलिजेन्ट प्रिमियम अर्बन इभी एसयूभी हो । एआई प्रविधिबाट सञ्चालित यस सवारीसाधनमा उच्च प्रदर्शन, स्मार्ट फिचर, अत्याधुनिक डिजाइन र सुरक्षालाई विशेष प्राथमिकतामा राखिएको कम्पनीको दाबी छ । एमजीले यसलाई ‘इन्टेलिजेन्स इन मोसन’ भन्ने भावनासहित अगाडि सारेको छ ।

अब देशभरका सबै आधिकारिक एमजी शोरूममा आईएम ६ को बुकिङ खुला गरिएको छ भने इच्छुक ग्राहकहरूले टेस्ट ड्राइभको सुविधा पनि लिन सक्ने कम्पनीले जनाएको छ । 

प्यारामाउन्ट मोटर्सका महाप्रबन्धक सुनिलबहादुर क्षेत्रीले भने, ‘हामी नेपालमा एमजी आईएम ६ सार्वजनिक गर्न पाउँदा गर्व महसुस गरिरहेका छौं ।  यो गाडी एसएआईसीको ‘इन्टेलिजेन्स इन मोसन’को विश्व दृष्टिकोणलाई प्रतिनिधित्व गर् छ। उत्कृष्ट रेञ्ज, एआई असिस्टेड र लक्जरी क्याबिन अनुभवसहित, यो केवल ईभी मात्र नभई नेपालका लागि स्मार्ट ड्राइभिङको भविष्य हो ।’

एआई, लक्जरी र नवीनताको समिश्रण
एमजी आईएम ६ मा ‘फ्युचरिस्टिक एआई क्याबिन’, ‘आईएम डिजिटल च्यासिस’, ‘एड्भान्स्ड इलेक्ट्रिफिकेसन’ र ‘अल्टिमेट सेफ्टी’ जस्ता विशेषता समावेश गरिएको छ । 

यसमा ७५ किलोवाट घण्टाको एलएफपी ब्याट्री, ५०५ किलोमिटरसम्मको रेञ्ज, २०० किमी प्रतिघण्टाको उच्चतम गति, १०९ किलोवाटको ‘हरीकेन मोटर’ र ४५० एनएमको टर्क छ।

यस गाडीमा ‘रेनी नाइट मोड’, ‘वान टच पार्किङ’, ‘ब्लाइन्ड स्पट डिटेक्सन’, ‘ADAS प्रणाली’, ‘iSmart एप’ जस्ता इन्टेलिजेन्स र कन्ट्रोल फिचरहरू समावेश छन्, जसले स्मार्ट र सुरक्षित ड्राइभिङ अनुभव प्रदान गर्छ ।

‘Crab Mode’ सहितको इन्टेलिजेन्ट फोर-व्हील स्टेयरिङ र ५.०९ मिटरको टाइट टर्निङ रेडियसले शहरभित्रको सहज ह्यान्डलिङ सुनिश्चित गर्छ ।

आईएम ६ को संरचना सबमरीनबाट प्रेरित गरिएको छ जसमा उच्च शक्ति सामग्री प्रयोग गरिएको छ । गाडीमा अटोमेटिक इमर्जेन्सी ब्रेकिङ, लेन डिपार्चर वार्निङ, फर्वार्ड कोलिज़न वार्निङ, लेन चेन्ज असिस्ट र अन्य बौद्धिक सुरक्षा प्रणालीहरू समावेश छन् । 

गाडीको तापमान व्यवस्थापन, ब्याट्री चेक, पार्किङ लोकेसन ट्र्याक गर्नेसम्मका सबै सुविधा ‘iSmart’ मोबाइल एपमार्फत प्रयोग गर्न सकिने कम्पनीको भनाइ छ।