झापाको हरिनगर गाउँपालिका– ७ घर भएर काठमाडौंको सुकेधारा बस्ने विनोद साह र डोटीको शिखर नगरपालिका– ९ घर भएर कीर्तिपुर बस्ने लक्ष्मण पनेरु आपराधिक लाभ (एक्सटर्सन)सम्बन्धी कसुरमा जिल्ला प्रहरी परिसर काठमाडौंको हिरासतमा छन् ।

‘अख्तियारको कर्मचारी हौं’ भन्दै टोखा बस्ने ठमेलका एक व्यापारीसँग एक करोड रुपैयाँ मागेको आरोप उनीहरूमाथि छ ।

गएको असार ४ गतेदेखि ती व्यापारीलाई ह्वाट्सएपमा म्यासेज तथा फोन सम्पर्क गरेर निरन्तर धम्की दिएपछि पीडितले गत आइतबार (भदौ १५) गते मात्रै प्रहरीमा उजुरी दिएका थिए । उजुरीकै आधारमा प्रहरीले साह र पनेरुलाई नियन्त्रणमा लिएको हो ।

पक्राउ परेकामध्ये साह र पीडित व्यापारीबीच पुरानो चिनजान थियो । कुलेश्वरमा रक्सीको डिलर सञ्चालन गरी बस्ने साहलाई ती व्यापारीको आर्थिक हैसियतबारे राम्रै जानकारी थियो ।

त्यही मौकामा उनले आफ्नो पसलमा आइरहने पनेरुलाई ती व्यापारीको पारिवारिक पृष्ठभूमिबारे अवगत गराउँदै ‘पैसा कमाउने भए नागरिकताको विषय लिएर धम्की देऊ, पैसा दिन्छ, आधा–आधा बाँडेर लिउँला’ भनेको खुलेको छ ।

नेत्रविक्रम चन्द ‘विप्लव’ नेतृत्वको नेकपानिकट पनेरु असार ४ मा ठमेलमै पुगेर ‘म अख्तियारको कर्मचारी हुँ । तपाईंको नागरिकतासम्बन्धी उजुरी परेको छ । मोबाइल नम्बर दिनू अनि मैले सोधेको कुरा बताउनू’ भन्दै हिँडेका थिए । तर, ती व्यापारीको नागरिकतामा कुनै कैफियत थिएन ।

पछि ती व्यापारीले पनेरुलाई फोन गरेर ‘हामीहरूको नागरिकता सबै ठीक छ, आइन्दा फोन गरेर धम्की नदिनू’ भन्दै फोन काटे ।

व्यापारीले त्यति भनेर फोन काटेपछि पनेरुले एकैपटक गत साउन ७ गते ह्वाट्सएपमा ‘तपाईंहरू भ्रममा पर्नुभएको छ । तपाईंहरूको नाममा निवेदन समेत तयार पारी अदालतमा पठाउँछौं । मूर्खताले तपाईंको नै क्षति हुन्छ । तपाईंले कहिले भेट्ने हो ?’ भन्दै म्यासेज पठाए । ती व्यापारीलाई धेरै तनाव भएपछि उनी अख्तियार पुगेर पनेरुको नाम लिँदै ‘यो नाम गरेको व्यक्ति आयोगको कर्मचारी हो वा होइन ? मलाई नागरिकता नक्कली छ भनेर धम्की दिई एक करोड मागेको छ’ भन्दै बुझे ।

अख्तियारका कर्मचारीले लक्ष्मण पनेरु नाम गरेको कोही पनि कर्मचारी काम नगर्ने बताएपछि ती व्यापारी ढुक्क भए । अख्तियारका एक प्रहरी उपरीक्षक (एसपी) ले उक्त घटनाको आन्तरिक छानबिन गर्दा अनुसन्धान गर्नुपर्ने देखिएपछि ती व्यापारीलाई टेकुस्थित काठमाडौं उपत्यका अपराध अनुसन्धान कार्यालयमा जान सुझाए ।

अनि ती व्यापारी आफूलाई ह्वाट्सएपमा आएका म्यासेज र कल रेकर्ड लिएर अनुसन्धान कार्यालय पुगे । ती व्यापारीलाई पनेरुले पैसा नदिए मुद्दा दर्ता हुने र जेल जानेसम्मको धम्की दिएका थिए ।

पनेरुले व्यापारीलाई ‘तपाईंले चाइनाको वीच्याट समेत चलाउनु हुने रहेछ । अब तपाईंविरुद्ध सम्पत्ति शुद्धीकरणमा समेत मुद्दा चलाउन सिफारिस गर्छौं,’ भन्दै धम्की दिएका थिए ।

पनेरुले व्यापारीलाई ह्वाट्सएपमा पठाएको म्यासेजमा ‘अब दशैं आउँदैछ, हेर तिमी दशैंमा भित्र जाने कि घरमा मासु र भात खाने हो, होश गर, तिम्रो अर्को सूचना पनि छ’ भन्दै धम्की दिएका थिए ।

अरू त अरू पनेरुले राष्ट्रिय स्वतन्त्र पार्टी (रास्वपा) का सभापति एवं पूर्व उपप्रधान तथा गृहमन्त्री रवि लामिछानेको नागरिकता प्रकरणलाई समेत जोडेर म्यासेज पठाएका थिए ।

‘तपाईंलाई मौका पूरै छ, मौका नदिने भए सिधै प्रक्रियामा अघि बढ्थें, अझै तपाईंलाई लाग्छ कि यस्तै अल्झाऊँ, बेक्कारमा दु:ख पाइएला,’ पनेरुले व्यापारीलाई ह्वाट्सएपमा पठाएको म्यासेजमा भनिएको छ, ‘रविको प्रक्रियागत गल्ती थियो र त त्यो झमेला भोग्नुपर्‍यो, तपाईंहरूको त झन् वैधानिक नै छैन ।’

अनुसन्धान कार्यालयले सबै विवरण र व्यापारीलाई ह्वाट्सएपमा आएको म्यासेज हेरेर पनेरुलाई पक्राउ गर्ने रणनीति बनायो ।

पनेरुलाई फोन गर्न लगायो । पैसाको लेनदेन कलंकी खसीबजारस्थित भाटभटेनी सुपरमार्केट अगाडि गर्ने समझदारीअनुसार सोमबार व्यापारीलाई लिएर प्रहरी त्यहीँ पुग्यो ।

एक करोडमा भएको बार्गेनिङ २० लाखमा टुंग्याउँदै शुरूमा दुई लाख नगद दिने र बाँकी १८ लाख एक हप्ताभित्रै दिने सहमति अनुसार पैसा लिन भाटभटेनी पुगेका पनेरुलाई प्रहरीले पक्राउ गर्‍यो । पनेरुले आफूलाई व्यापारी धम्क्याउन र पैसा माग्न लगाउने व्यक्ति विनोद साह रहेको बताएपछि प्रहरीले साहलाई पनि लगत्तै नियन्त्रणमा लियो ।

अनुसन्धान कार्यालयका प्रवक्ता एवं प्रहरी उपरीक्षक काजीकुमार आचार्यका अनुसार पक्राउ परेका साह र पनेरुलाई थप कारबाहीका लागि जिल्ला प्रहरी परिसर काठमाडौं पठाइएको छ ।

उनले भने,‘ अख्तियारको नक्कली कर्मचारी बनेर नक्कली नागरिकतामा मुद्दा चलाइदिन्छौं भन्दै एक करोड रुपैयाँ मागेको पाइयो । पीडितको उजुरीपछि हामीले पक्राउ गरेर परिसर पठाएका हौं ।’

पक्राउ परेका साह र पनेरुविरुद्ध आपराधिक लाभ (एक्सटर्सन) कसुरमा म्याद थप गरेर काठमाडौं परिसरले अनुसन्धान गरिरहेको छ ।