‘जेनजी’ (सन् १९९७–२०१२ भित्र जन्मिएको पुस्ता)ले सोमबार राजधानीमा विरोध प्रदर्शन गर्ने तयारी गरेपछि सरकारले सुरक्षा व्यवस्था कडा पार्ने भएको छ ।

जिल्ला प्रशासन कार्यालय काठमाडौंमा आइतबार जिल्ला सुरक्षा समितिको बैठक बसेर सुरक्षा व्यवस्था कडा पार्ने निर्णय भएको हो ।

काठमाडौंका प्रमुख जिल्ला अधिकारी छवि रिजालको संयोजकत्वमा बसेको बैठकमा ‘जेनजी’ पुस्ताले सोमबार गर्ने भनिएको प्रदर्शनबारे गम्भीर छलफल भएको थियो ।

कुनै दल वा निश्चित नेतृत्वविना नै माइतीघरमा हुन लागेकाले प्रदर्शन कस्तो हुने भन्ने निश्चित भइसकेको छैन । सोही संवेदनशीलतालाई ध्यानमा राख्दै बैठकमा छलफल भएको थियो ।

शान्तिपूर्ण प्रदर्शनमा हस्तक्षेप नगर्ने, तर सुरक्षा व्यवस्था कडा पारिने प्रमुख जिल्ला अधिकारी रिजालले बताए ।

‘शान्तिपूर्ण प्रदर्शनमा प्रहरीले हस्तक्षेप गर्दैन, हामी सुरक्षा व्यवस्थामा कुनै कसर बाँकी राख्दैनौं,’ रिजालले लोकान्तरसँग भने, ‘नेपाल प्रहरी र सशस्त्र प्रहरीको संयुक्त समन्वयमा सुरक्षाकर्मी परिचालन गर्छौं ।’

सरकारले सामाजिक सञ्जाल निष्क्रिय बनाउने निर्णय गरेपछि ‘जेनजी’ पुस्ता सडकमा ओर्लिन लागेको हो । भ्रष्टाचार अन्त्यसहितका विषयलाई प्रदर्शनको मुख्य नारा बनाइएको छ ।

प्रदर्शनलाई काठमाडौं महानगरपालिकाका प्रमुख मेयर बालेन साहले समेत समर्थन जनाएका छन् । त्यस्तै, व्यवसायी दुर्गा प्रसाईंले पनि सोमबारको प्रदर्शनमा साथ दिने बताइरहेका छन् ।

सरकारले केही दिनअघि मात्रै सामाजिक सञ्जाल निर्देशिका, २०८० अनुरूप सूचीकरण नभएका फेसबूक लगायत सामाजिक सञ्जाललाई निष्क्रिय बनाउने निर्णय गरेको थियो ।

उक्त निर्णयपछि युवाहरूको ठूलो जमातले असन्तुष्टि व्यक्त गरेको छ ।