हरिप्रसाद कल्याणी रिमाल नाट्य संगीत प्रतिष्ठानले आयोजना गरेको ‘राष्ट्रिय लघुत्तम चलचित्र महोत्सव’मा उत्कृष्ट प्रथम लघु फिल्म ‘संगिनी’ र उत्कृष्ठ निर्देशकमा ‘कलर अफ टी’का निर्देशक राज सरगम भएका छन् ।  

बिहीबार राष्ट्रिय नाचघरमा रेडियो नेपालका प्रथम गायक रंगकर्मी, अभिनेता तथा गीतकार स्वर्गीय हरिप्रसाद रिमालको १०१ औं जन्मजयन्तीको अवसरमा हरिप्रसाद कल्याणी रिमाल नाट्य संगीत प्रतिष्ठानले कार्यक्रम आयोजना गरेको हो । 

महोत्सवमा नौ लघु चलचित्र प्रतिस्पर्धी थिए । प्रतिष्ठानका सदस्य सचिव सम्राट सापकोटाका अनुसार दुई दर्जन लघु चलचित्रमध्ये प्रतिस्पर्धाका लागि नौ चलचित्र छानिएको हो । उनले भने, ‘गुरू हरिप्रसाद रिमाल अभिनेता पनि भएकाले छोटो चलचित्रको महोत्सव पनि आयोजना गरेका हौं । र, यो महोत्सवले नयाँ भाइबहिनीलाई इनकरेज गर्ने छ ।’

उत्कृष्ट तीन चलचित्रमा विनोद लोहार निर्देशित ‘संगिनी’, राज सरगम निर्देशित ‘कलर अफ टी’, सुरेश पोर्तेल निर्देशित ‘अन्तिम राप’ भएका छन् । जसलाई प्रतिष्ठानले क्रमश: नगद १ लाख, ५० हजार र २५ हजार र सम्मानपत्रले सम्मान गरेको छ ।

त्यस्तै, व्यक्तिगततर्फ उत्कृष्ट सम्पादन, उत्कृष्ट लेखक, निर्देशक, अभिनेता, अभिनेत्री, क्यामेराम्यान र सम्पादक गरी ६ विधाकाले जनही १५ हजार रूपैयाँ र सम्मानपत्र प्राप्त गरेका छन् । 

निर्णायमा रंगकर्मी, कलाकार तथा निर्देशक हरिहर शर्मा, पहिलो नेपाली नायिका भुवन चन्द र रेडियोकर्मी तथा कलाकार मदनदास श्रेष्ठ थिए । 

त्यसैगरी, प्रतिष्ठानले नाट्यसंगीत तथा पत्रकारितामा योगदान पुर्‍याउन स्रष्टालाई सम्मान गरेको थियो ।

प्राध्यापक डाक्टर बासुदेव त्रिपाठीको प्रमुख आतिथ्यमा भएको कार्यक्रममा गायिका मिरा राणा, सञ्चार तथा सूचना प्रविधि मन्त्री जगदीश खरेल र गायक धिरज राईलाई जनही एक लाख र सम्मानपत्रले सम्मानित गरिएको आयोजकले जनाएको छ । 

कार्यक्रममा मन्त्री खरेलको व्यक्तित्वमाथि लेखक निबन्धकार दीपक सापकोटाले व्यक्तित्व, योगदान र प्रेरणादायी जीवनका विविध पक्षबारे चर्चा गरे । उनले भने, ‘पत्रकार जगदीश खरेलज्यूले चलाउने ‘हट सिट’ कार्यक्रमले नेपाली समाजमा बहस सिर्जना गरेको थियो । राज्य सञ्चालन गर्नेहरूलाई गम्भीर तयारी गर्न बाध्य बनाउँदै आएको थियो । 

त्यसैगरी, गायक धिरज राई, गायिका मिरा राणाको व्यक्तित्वमाथि कलाकार तथा प्रतिष्ठानका सदस्य सचिव सम्राट सापकोटा र कलाकार रविन्द्र खड्काले प्रस्ट्याएका थिए । गायक राई युरोपका शहरमा ‘बुद्ध वाज बर्न’ भन्दै विश्वमा बुद्ध चिनाउन हिँडिरहेका अभियन्ता हुन् । उनका दर्जन गीत हिट छन् । पाँच दशकदेखि सांगीतिक क्षेत्रमा बिताएकी राणाले विभिन्न भाषा र नेपाली चलचित्रका लागि पनि गाएकी छन् । 

पुरस्कार ग्रहण गरिसकेपछि मन्त्री खरेलले आफूले गलत काम नगर्ने प्रतिबद्धता गरे । उनले भने, ‘मैले जानेर बुझेर कुनै काम गर्ने छैन । तेरो कारणले खराब काम भयो भन्ने बनाउने छैन । मलाई नागरिक सरकारले मन्त्री बनाएको हो । तपाईंहरूले डोर्‍याएको बाटो हिँड्ने छु ।’

मन्त्री खरेललाई प्रतिष्ठानले सम्मान गर्ने निर्णय मन्त्री हुन अगाडि नै गरेको थियो । असोजको २ गते गरिने भनिएको कार्यक्रम जेनजी आन्दोलनका कारण पछाडि सरेको थियो ।

भाषा साहित्य क्षेत्रमा लामो योगदान पुर्‍याएका प्रध्यापक डा। बासुदेव त्रिपाठीले यस्ता प्रतिष्ठानहरूलाई बचाइराख्न नयाँ पुस्तालाई पनि सँगसँगै लैजानु पर्ने बताए । 

उनले पुरस्कृत स्रष्ठा तथा प्रतिस्पर्धाका लागि सहभागी चलचित्र निर्देशक कलाकारलाई शुभकामना तथा बधाई दिए । उनले भने, ‘हरिप्रसाद रिमाल र कल्याणी रिमालको नाममा स्थापित यो प्रतिष्ठानले नयाँ पुस्तालाई हौसला दिने काम गरेको छ ।’

कार्यक्रममा ९४ वर्ष लागेकी हरिप्रसाद रिमालकी धर्मपत्नी कल्याणी रिमालको पनि उपस्थिति थियो ।