गत साता भारतीय अन्तरिक्ष अनुसन्धान संगठन इसरोले अन्तरिक्ष क्षेत्रमा अर्को महत्वपूर्ण सफलता हासिल गरेको छ । यो मिसन सजिलो भने थिएन । बुधबार इसरोले एलभिएम थ्री–एम सिक्स रकेट सफलतापूर्वक प्रक्षेपण गर्दै अमेरिकाको नयाँ पुस्ताको ब्लूबर्ड ब्लक–टु सञ्चार उपग्रहलाई कक्षमा स्थापना गरेको हो ।

इसरोले सामाजिक सञ्जाल एक्समार्फत छोटो सन्देश जारी गर्दै सफलताको पुष्टि गरे पनि यस मिशनसँग जोडिएका आँकडाले वास्तविक उपलब्धि स्पष्ट पार्छन् । छ हजार एक सय केजी तौलको यो उपग्रह एलभिएम थ्री रकेटमार्फत लो अर्थ अर्बिटमा पुर्‍याइएको अहिलेसम्मकै सबैभन्दा भारी पेलोड हो । यससँगै इसरोले आफ्नै अघिल्लो रेकर्ड तोड्दै भारी भार बोक्ने क्षमताको पुनः पुष्टि गरेको छ ।

अमेरिकास्थित एएसटी स्पेस मोबाइलले निर्माण गरेको ब्लूबर्ड ब्लक–टु सामान्य उपग्रह मात्र होइन । यो मोबाइल टावर पुग्न कठिन क्षेत्रहरूमा समेत साधारण स्मार्टफोनमार्फत फोर जी र फाइभ जी सेवा उपलब्ध गराउने उद्देश्यले डिजाइन गरिएको हो । यसका लागि कुनै विशेष उपकरण आवश्यक पर्दैन । प्रयोगकर्ताको नियमित मोबाइल फोन नै पर्याप्त हुने र बाँकी काम अन्तरिक्षबाट हुने कम्पनीको दाबी छ ।

यो मिशन इसरोको सबैभन्दा शक्तिशाली प्रक्षेपकको छैटौं सञ्चालनात्मक उडान हो । यसले विश्वव्यापी अन्तरिक्ष अभियानमा भारतको बढ्दो भूमिकालाई समेत उजागर गरेको छ । केन्द्रीय मन्त्री डा. जितेन्द्र सिंहले इसरो टोलीको निरन्तर सफलताका लागि प्रशंसा गर्दै यसलाई भारतको विस्तार हुँदै गएको अन्तरिक्ष क्षमताको अर्को महत्त्वपूर्ण उपलब्धि भनेका छन् ।

उपग्रह अक्टोबर महिनामा अमेरिकाबाट भारत ल्याइएको थियो र हाल एएसटी स्पेस मोबाइलको विस्तार हुँदै गएको उपग्रह समूहमा सामेल भइसकेको छ । कम्पनीले यसअघि पाँचवटा ब्लूबर्ड उपग्रह प्रक्षेपण गरिसकेको छ र विश्वभरका पचासभन्दा बढी मोबाइल सेवा प्रदायकसँग साझेदारी गरिसकेको जनाएको छ । यसको दीर्घकालीन लक्ष्य मोबाइल सिग्नल नपुग्ने समस्यालाई पूर्ण रूपमा अन्त्य गर्नु हो ।

यो मिशन यसै वर्ष सफल भएको नासा–इसरो निसार संयुक्त परियोजनापछि अघि बढेको अमेरिका–भारत अन्तरिक्ष सहकार्यको अर्को महत्वपूर्ण कडीका रूपमा पनि हेरिएको छ । इसरोले बिस्तारै अन्तरिक्ष प्रविधिलाई सर्वसाधारणको पहुँचसम्म नजिक ल्याउँदै लगिरहेको संकेत यसले दिएको छ ।