प्रधानमन्त्री कप पुरुष एकदिवसीय राष्ट्रिय क्रिकेट प्रतियोगिताको मंगलबार सम्पन्न खेलमा गण्डकी प्रदेशले कर्णाली प्रदेशलाई नौ विकेटले हराएको छ । 

वीरगञ्जस्थित नारायणी रंगशालामा टस हारेर पहिले ब्याटिङको निम्तो पाएको कर्णाली प्रदेश २५.२ ओभरमै केवल ७२ रन बनाउँदै अलआउट भएको थियो । 

जवाफी ब्याटिङमा ओर्लिएको गण्डकी प्रदेशले १३ ओभरमै केवल एक विकेट गुमाएर ७४ रन बनाउँदै विजयलक्ष्य पार गर्‍यो । गण्डकी प्रदेशको जितमा ओपनर सिबरिन श्रेष्ठले अविजित ४० रनको योगदान गरे ।

उनले ३४ बलमा एक छक्का र पाँच चौका पनि हिर्काए । दीपक डुम्रेले पनि टोलीका लागि अविजित २२ रनको योगदान गरे । ओपनर अर्जुन कुमाल भने ६ रन बनाउँदै आउट भए । उनी प्रधानमन्त्री कप क्रिकेटको इतिहासमा एउटै संस्करणमा सर्वाधिक रन बनाउने खेलाडी पनि बनेका छन् । उनले कुल पाँच सय चार रन बनाएका छन् । 

कर्णालीका बलर विपिन शर्माले एक विकेट लिए । त्यसअघि, कर्णाली प्रदेशका तीन ब्याट्सम्यानले मात्र दोहोरो अंकमा रन बनाउन सकेका थिए । अर्जुन घर्तीले १३, कप्तान दिवान पुनले १४ र प्रकाश जैसीले अविजित १५ रन बनाए । गण्डकी प्रदेशका बलर विपिन खत्री एक्लैले पाँच विकेट लिए । उनले १० ओभरमा चार मेडन राख्दै केवल १८ रन खर्चिए । 

अपराजित पौडेलले पनि तीन विकेट हात पारे । कर्णाली र गण्डकी प्रदेश दुवैको फाइनलमा पुग्ने सम्भावना भने यसअघि नै समाप्त भइसकेको छ । यी दुबै टोलीले आफ्नो अन्तिम खेल खेलिरहेका हुन् । नौ खेलबाट नौ अंक जोडेको गण्डकी प्रदेश तालिकाको छैटौँ स्थानमा आसिन छ । समान खेलबाट तीन अंक बटुलेको कर्णाली प्रदेश नवौँ स्थानमा छ । 

अंक तालिकाको पहिलो र दोस्रो स्थानमा रहने टोलीबीच फाइनल खेल हुनेछ । त्रिभुवन आर्मी क्लब र सुदूरपश्चिम प्रदेश यसअघि नै फाइनलमा पुगिसकेका छन् । अंक तालिकाको माथिल्लो ६ स्थानमा रहने टोलीले जय ट्रफी क्रिकेट प्रतियोगिताको आगामी संस्करण खेल्ने अवसर पाउने छन् ।