प्रधानमन्त्री कप क्रिकेट प्रतियोगिताको फाइनल खेल शुक्रबार विभागीय टोली त्रिभुवन आर्मी क्लब र सुदूरपश्चिम प्रदेशबीच खेलिँदै छ । खेल वीरगञ्जस्थित नारायणी रंगशालामा बिहान ९:०० बजे शुरू हुनेछ ।

लिग चरणको खेलपछि तालिकामा आर्मी क्लब पहिलो र सुदूरपश्चिम प्रदेश दोस्रो हुँदै फाइनलमा पुगेका हुन् । जारी प्रतियोगितामा एक खेल पनि नहार्ने आर्मी क्लब एक मात्र टोली हो । आर्मी क्लबले नौ खेलबाट १७ अंक जोड्यो । आर्मीको एक खेल भने अनिर्णित रूपमा सकिएको थियो ।

सुदूरपश्चिम प्रदेशले भने नौ खेलबाट १२ अंक बटुल्यो । पहिलोपटक प्रधानमन्त्री कपको फाइनलमा पुगेको सुदूरपश्चिमले लिग चरणमा ६ जित र तीन हारको नतिजा निकाल्यो । हालसम्म अब्बल प्रदर्शन गर्दै आएका यी दुई टोलीबीचको उपाधि भिडन्त रोमाञ्चक हुने अनुमान गरिएको छ ।

प्रतियोगिताको लिग चरणमा पनि यी दुई टोली एकपटक आपसमा भिडेका थिए । जनकपुरस्थित राम–जानकी क्रिकेट स्टेडियममा खेलिएको उक्त खेलमा आर्मी क्लबले सुदूरपश्चिम प्रदेशलाई सात विकेटले हराएको थियो ।

उक्त खेलमा टस जिती पहिले ब्याटिङको निर्णय लिएको सुदूरपश्चिम प्रदेशले ३८.१ ओभरमै अलआउट हुनुअघि एक सय ५० रन मात्र बनाउन सकेको थियो । जवाफमा आर्मी क्लबले २०.२ ओभरमै केवल तीन विकेट गुमाएर लक्ष्य पूरा गरेको थियो ।

जारी प्रतियोगितामा आर्मी क्लब निकै सन्तुलित देखिएको छ । अनुभवी खेलाडी विनोद भण्डारीको कप्तानीमा रहेको आर्मी क्लबको ब्याटिङ, बलिङ र फिल्डिङ गरी तीनवटै पक्ष अब्बल छ । जारी प्रतियोगितामा तीन सयभन्दा बढीको योगफल बनाउने चार टोलीमध्ये आर्मी पनि एक हो ।

आर्मी क्लबले कोशी प्रदेशविरुद्धको खेलमा निर्धारित ओभरमा आठ विकेट गुमाएर तीन सय ६२ रन बनाएको थियो । जारी प्रतियोगितामा हालसम्म बनेको यो दोस्रो ठूलो स्कोर हो । आर्मी क्लबले जारी प्रतियोगितामा पाँचपटक दुई सयभन्दा बढी रन बनाएको छ ।

जारी प्रतियोगितामा सर्वाधिक एकल रन बनाउने ब्याट्सम्यानको सूचीमा आर्मीका कप्तान विनोद भण्डारी तेस्रो स्थानमा छन् । उनले नौ खेलको आठ पालीमा कुल चार सय दुई रन बनाइसकेका छन् । यस क्रममा उनले दुई शतक र एक अर्धशतक प्रहार गरेका छन् ।

यसैगरी, टोलीका अर्का अनुभवी खेलाडी भीम सार्कीले पनि नौ खेलको आठ पालीमा कुल दुई सय ४९ रन बनाएका छन् । उनले तीनवटा अर्धशतक प्रहार गरेका छन् । कुशल मल्लले पनि आठ पालीमा एक अर्धशतकको मद्दतले कुल दुई सय ३७ रन बनाएका छन् ।

आर्मीका ओपनर ब्याट्सम्यान तृतराज दास पनि लयमा छन् । उनले आठ पालीमा तीन अर्धशतकको मद्दतले कुल दुई सय ३५ रन बनाएका छन् । बसिर अहमदले पनि एक शतकको मद्दतले टोलीका लागि दुई सय सात रनको योगदान गरिसकेका छन् ।

आर्मी क्लबका बलरहरू पनि लयमा देखिएका छन् । बसिर अहमदले हालसम्म १७ विकेट लिइसकेका छन् । नरेश साउदले १५, साहब आलमले १४, आकाश चन्दले १२ र कुशल मल्लले १० विकेट लिइसकेका छन् ।

सुदूरपश्चिम प्रदेशले पनि उत्कृष्ट प्रदर्शन गर्दै आएको छ । तर, सुदूरपश्चिम प्रदेशको ब्याटिङमा एकरूपता देखिँदैन । सुदूरपश्चिम प्रदेशले जारी प्रतियोगितामा दुई खेलमा मात्र दुई सयभन्दा बढी रन बनाउन सकेको छ ।

सुदूरपश्चिमले एपीएफ क्लबविरुद्ध दुई सय १४ र बागमती प्रदेशविरुद्ध दुई सय नौ रन बनाएको थियो । सर्वाधिक रन बनाउने ब्याट्सम्यानको सूचीमा सुदूरपश्चिम प्रदेशका नारायण जोशी पाँचौँ स्थानमा छन् । उनले नौ खेलको आठ पालीमा कुल तीन सय तीन रन बनाएका छन् ।

यस क्रममा उनले तीनवटा अर्धशतक पनि बनाएका छन् । जारी प्रतियोगितामा तीन सयभन्दा बढी रन बनाउने सुदूरपश्चिम प्रदेशका उनी एकमात्र ब्याट्सम्यान हुन् । अभिषेक पालले पनि नौ खेलमा एक अर्धशतकको मद्दतले कुल दुई सय ४७ रन बनाएका छन् ।

यसैगरी, खड्क बहादुर बोहराले एक अर्धशतकको मद्दतले कुल एक सय ६१ रन जोडेका छन् । दीपक बोहराले सात खेलमा कुल एक सय ३७ रन बटुलेका छन् । ब्याटिङको तुलनामा सुदूरपश्चिम प्रदेशका बलरले भने गजबको प्रदर्शन गर्दै आएका छन् ।

सुदूरपश्चिम प्रदेशका मध्यमतेज गतिका बलर हेमन्त धामी जारी प्रतियोगितामा सबैभन्दा बढी विकेट लिने बलरको सूचीमा संयुक्त रूपमा पहिलो स्थानमा आसीन छन् । उनले नौ खेलमा २५ विकेट लिइसकेका छन् ।

बागमती प्रदेशका लेग–स्पिनर सन्दीप लामिछानेले पनि २५ विकेट लिएका छन् । हेमन्त र सन्दीप दुबैले एक–एक खेलमा सात विकेट पनि लिएका छन् । सुदूरपश्चिम प्रदेशकै स्पिनर शेर मल्ल सर्वाधिक विकेट लिने बलरको सूचीमा दोस्रो स्थानमा छन् ।

मल्लले नौ खेलमा २२ विकेट लिइसकेका छन् । बायाँहाते बलर अशोक धामीले पनि कुल नौ विकेट हात पारेका छन् । विकेटकिपरको भूमिकामा आमी क्लबका अर्जुन साउद र सुदूरपश्चिम प्रदेशका दीपक बोहराले पनि अब्बल प्रदर्शन गर्दै आएका छन् ।

अर्जुन साउदले विकेटकिपरको भूमिकामा विपक्षी टोलीका १४ ब्याट्सम्यानलाई पेभेलियन फर्काएका छन् । उनले उनले १० ब्याट्सम्यानको क्याच लिएका हुन् भने चार ब्याट्सम्यानलाई स्टम्पिङ गरेका छन् । दीपक बोहराले पनि विपक्षी टोलीका नौ ब्याट्सम्यानलाई पेभेलियन फर्काएका छन् । उनले नौ ब्याट्सम्यानकै क्याच लिएका हुन् ।

शुक्रबारको फाइनलमा एकातिर, आर्मी क्लब अपराजित रहँदै उपाधि कुम्ल्याउने धुनमा रहने छ भने अर्कोतिर, उपाधिको भोको सुदूरपश्चिम प्रदेश ठूला प्रतियोगिताको फाइनलमा पुग्दै पराजित हुने विगतलाई बिर्सिएर महत्त्वपूर्ण उपाधि कुम्ल्याउने योजनामा रहने छ । सुदूरपश्चिम प्रदेश यसअघि दुईपटक नेपाल प्रिमियर लिग (एनपीएल) को फाइनलमा पराजित भइसकेको छ ।