काठमाडौं, २१ पुस– भारतको बिहारका पूर्वमुख्यमन्त्री लालुप्रसाद यादवले जेलभित्रको दैनिक जीवन कठोर बनिरहेको भन्दै छिटै जेलमुक्त हुन पाऊँ भनी आग्रह गरेका छन् । जेलभित्र धेरै समस्या आइरहेको र त्यसबाट छुटकारा पाउन उनले न्यायाधीशसमक्ष यस्तो आग्रह गरेका हुन् । 

चर्चित ‘चारा घोटाला’ काण्डको सुनवाइका क्रममा बिहीबार अदालत पुगेका लालुप्रसादले न्यायाधीशसमक्ष त्यस किसिमको अनुरोध गरेको भारतीय संचारमाध्यमले जनाएका छन् । प्रहरीले गत साता चारा घोटालाका १६ मुख्य दोषीहरूलाई पक्री लालुप्रसादलाई पनि हिरासतमा लिएको हो । त्यो मुद्दा अहिले झारखण्डको अदालतमा चलिरहेको छ । सबै दोषीलाई प्रहरीले एकैपटक मुद्दा चलाएको छ ।

प्रहरीले बिहीबारको सुनवाइका क्रममा लालुप्रसादलाई अदालतमा प्रस्तुत गरेको हो । अदालतले शुक्रबार आफ्नो फैसला सुनाउनेछ । बिहीबार बहसका क्रममा लालुले न्यायाधीशलाई आफूतर्फ ध्यानाकर्षण गरी न्याय पाउनेमा विश्वस्त रहेको बताए । तर, उनले धेरैजसो समय न्यायाधीशलाई जेलमा भोगिरहेको समस्या मात्र बताइरहे ।

न्यायाधीशले पनि लालुलाई ठट्टा गर्दै जेलभित्र चिसो भए तबला र हारमोनियम बजाउन सुझाब दिएका छन् । अदालतले चारा घोटालाका मुख्य दोषीलाई धेरैमा सात वर्ष र थोरैमा एक वर्ष जेल सजाय फैसला सुनाउन सक्ने छ ।