२६ जेठ २०८३, मंगलबार
आईसीसी क्रिकेट विश्वकप लिग–२ शृंखलाको शनिबार जारी खेलमा नेपालले संयुक्त अरब इमिरेट्स (यूएई)लाई जितका लागि दुई सय एक रनको मध्यम लक्ष्य दिएको छ ।
कीर्तिपुरस्थित अन्तर्राष्ट्रिय क्रिकेट मैदानमा टस हारेर पहिले ब्याटिङको निम्तो पाएको नेपालले ४८.२ ओभरमा अलआउट हुनुअघि दुई सय रन बनाएको हो ।
नेपाली टोलीका ब्याट्सम्यानहरूले गतिलो प्रदर्शन गर्न सकेनन् । टोलीको कूल स्कोर ५० रन पुग्नुअगावै नेपालले चार विकेट गुमाइसकेको थियो ।
छैटौँ नम्बरमा क्रिज समाल्न आएका दीपेन्द्रसिंह ऐरीले उत्कृष्ट अर्धशतकीय पाली खेले । टोली अप्ठ्यारो स्थितिमा रहँदा उनले ७५ रन बनाए । यसक्रममा उनले ९० बलको सामना गरी दुई छक्का र पाँच चौका हिर्काए ।
दीपेन्द्रले ५९ बलमै एक छक्का र चार चौकाको मद्दतले अर्धशतक पूरा गरेका थिए । एकदिवसीय अन्तर्राष्ट्रिय क्रिकेटमा दीपेन्द्रले बनाएको यो छैटौँ अर्धशतक हो ।
ओपनर कुशल भुर्तेल २५ बलमा चार चौकाको मद्दतले २४ रन बनाउँदै आउट भए । अर्का ओपनर आसिफ शेख पनि सात रनभन्दा अगाडि बढ्न सकेनन् ।
भीम सार्कीले १६ बलमा दुई चौकाको मद्दतले १० रन जोडे भने कप्तान रोहित पौडेल ११ बलमा केवल दुई रन बनाउँदै पेभेलियन फर्किए ।
पाँचौँ नम्बरमा क्रिज समाल्न आएका बसिर अहमदले २० रन बटुले । उनले ४० बलको सामना गरी तीन चौका पनि हिर्काएका थिए ।
आरिफ शेखले टोलीको खातामा १५ रन थपे । उनले ३१ बलमा एक चौका हिर्काए । सोमपाल कामी पनि २४ बलमा एक चौकाको मद्दतले १५ रन बनाउँदै आउट भए ।
करण केसी २२ रन बनाउँदै पेभेलियन फर्किए । उनले ३७ बलको सामना गरी एक छक्का र एक चौका हिर्काए । सन्दीप लामिछाने सात बलमा दुई रन बनाउँदै आउट भए ।
अन्तिम ब्याट्सम्यानका रूपमा क्रिज समाल्न आएका ललित राजवंशी शून्य रनमा अविजित रहे । नेपालले अतिरिक्त रूपमा आठ रन पायो ।
यूएईका बलर अजय कुमारले तीन विकेट लिए । जुनैद सिद्धकीले पनि तीन विकेट हात पारे । खजैमा तनवीरले पनि एक विकेट लिए ।
यही खेलमार्फत यूएईका ६ खेलाडीले एकैपटक एकदिवसीय अन्तर्राष्ट्रिय क्रिकेटमा ‘डेब्यू’ गरे । अक्षदीप नाथ, अदिब उस्मानी, अजय कुमार, हरप्रित सिंह, खुजैमा तनवीर र निलांश केशवानीले ‘डेब्यू’ गरेका हुन् ।
अदिब उस्मानी, अजय कुमार र खजैमा तनवीरले त ‘लिस्ट ए’ क्रिकेट नै पहिलो पटक खेलेका हुन् । अजय कुमार र खुजैमा तनवीरले आफ्नो ‘डेब्यू’ खेलमै विकेट लिए ।
