२६ जेठ २०८३, मंगलबार
नेपाली रङ्गमञ्चमा लामो समयदेखि सक्रिय नाटककार, निर्देशक एवं अभिनेता पुरू लम्सालको नयाँ नाटक संग्रह ‘निऋति’ सार्वजनिक भएको छ ।
नेपाल संगीत तथा नाट्य प्रज्ञा प्रतिष्ठानका प्राज्ञ सभा सदस्यसमेत रहेका लम्सालको नाट्यकृति ‘निऋति’लाई शिखा बुक्सले बजारमा ल्याएको छ ।
लम्सालले लामो समयदेखि ‘नेपाली रङ्गमञ्चमा नेपाली नाटक’ भन्ने अभियान चलाइरहेका छन् । उनले विदेशी नाटकको प्रभावलाई कम गर्दै नेपाली माटो र परिवेशका नाटक लेखिनुपर्छ र मञ्चन हुनुपर्छ भन्ने अभियानको नेतृत्व गर्दै आएका छन् ।
पुस्तकको भूमिकामा प्राध्यापक डा. रामचन्द्र पोखरेलले लम्सालको नाट्ययात्रालाई नेपाली नाटकको इतिहाससँग जोडेर चर्चा गरेका छन् ।
पोखरेलका अनुसार नेपाली नाटक लेखनमा बालकृष्ण समको उत्तराधिकारीका रूपमा अशेष मल्ल देखिए झैँ, मल्लको उत्तराधिकारीका रूपमा अहिले पुरू लम्साल सक्रिय छन् ।
लम्सालले नाटक लेखन, निर्देशन र अभिनय तीनवटै विधामा निरन्तर दिएको योगदानलाई कदर गर्दै डा. पोखरेलले उनलाई ‘बालकृष्ण समको नाति पुस्ताका नाटककार’का रूपमा चित्रण गरेका छन् ।
संग्रहभित्र पाँचवटा फरक–फरक स्वादका नाटक समावेश छन् ।
