नेपाल महिला रेस्लिङ फाउन्डेसनले मनाङको तिलिचो तालमा आयोजना गरेको रेस्लिङ खेललाई ‘वर्ल्ड बुक अफ रेकर्डस’ लन्डनमा समावेश गरिएको छ ।

चार हजार नौ सय १९ मिटर उचाइमा अवस्थित तिलिचो तालमा आयोजना गरिएको रेस्लिङलाई ‘वर्ल्ड बुक अफ रेकर्डस’मा समावेश गरिएको हो ।

गत नोभेम्बर २६ तारिखमा तिलिचोमा भएको रेस्लिङमा नेपालबाट भगवती खड्का (युनिका) र अस्मिता सुनार (जुरेली) ले अमेरिकी रेस्लर क्यामिल लिगन (होलीडेड)सँग प्रतिस्पर्धा गरेका थिए । त्यो खेलमा भगवती र अस्मिता विजयी भएका थिए ।

पूर्वउपसभामुख इन्दिरा रानाले एक कार्यक्रमबीच भगवती र अस्मितालाई ‘वर्ल्ड बुक अफ रेकर्ड’को प्रमाणपत्र प्रदान गरिन् । नेपाल महिला रेस्लिङ फाउन्डेसनमा भगवती अध्यक्ष र अस्मिता कोषाध्यक्षको जिम्मेवारीमा पनि छन् ।

फाउन्डेसनले विश्वकै अग्लो स्थानमा रेस्लिङ खेलेर कीर्तिमान कायम गर्ने उद्देश्यले सोलुखुम्बुको खुम्बु गाउँपालिकास्थित पाँच हजार ६ सय ३३ मिटरको उचाइमा रहेको कालापत्थरमा पनि मैत्रीपूर्ण रेस्लिङ आयोजना गरेको थियो ।

एभरेष्ट दिवसका अवसरमा आयोजित मैत्रीपूर्ण रेस्लिङमा भगवतीले अमेरिकी रेस्लर डानियल मोरिसन (डानी मो)लाई पराजित गरेकी थिइन् ।

त्यो खेलमा अस्मिताले भने निर्णायकको भूमिका निर्वाह गरेकी थिइन् ।