२६ जेठ २०८३, मंगलबार
इङ्ल्यान्डको पुरुष क्रिकेट टोलीले आगामी अन्तर्राष्ट्रिय क्यालेन्डरभित्र नेपालको भ्रमण गर्न सक्ने सम्भावना देखिएको छ ।
इङ्ल्यान्ड तथा वेल्स क्रिकेट बोर्डले सन् २०२७ देखि सन् २०३१ सम्मको अन्तर्राष्ट्रिय कार्यक्रमअन्तर्गत नेपालमा टी–२० अन्तर्राष्ट्रिय श्रृंखला खेल्ने विषयमा छलफल अघि बढाएको हो ।
हालका वर्षहरूमा नेपाली क्रिकेटले उल्लेखनीय प्रगति गरेको छ । गत वर्ष संयुक्त अरब इमिरेट्समा वेस्ट इन्डिजलाई पराजित गर्दै नेपालले पहिलो पटक पूर्ण सदस्य राष्ट्रविरुद्ध अन्तर्राष्ट्रिय श्रृंखला जितेको थियो । यद्यपि, अहिलेसम्म टेस्ट खेल्ने कुनै पनि राष्ट्रको सिनियर टोलीले नेपालको भ्रमण गरेको छैन ।
यसैबीच, क्रिकेट आयरल्यान्डले गत मार्चमा नेपाल क्रिकेट संघ (क्यान)सँग पाँच वर्षे रणनीतिक साझेदारी सम्झौताको घोषणा गरेको थियो । जसअन्तर्गत आयरल्यान्डले सन् २०२६–२७ सिजनमा नेपाल भ्रमण गर्ने योजना सार्वजनिक गरिसकेको छ ।
नेपाल र इङ्ल्यान्डको सिनियर टोलीबीच पहिलो पटक गत फेब्रुअरीमा भएको टी–२० विश्वकपमा प्रतिस्पर्धा भएको थियो । मुम्बईस्थित वानखेड़े रंगशालामा भएको उक्त खेल अन्तिम बलसम्म पुगेको थियो । त्यो खेलमा इङ्ल्यान्ड विजयी बनेको थियो ।
खेलपछि क्यानका सचिव तथा पूर्वकप्तान पारस खड्काले भारतमै इङ्ल्यान्ड क्रिकेट बोर्डका अधिकारीसँग भेटवार्ता गरेको जनाइएको छ । अन्तर्राष्ट्रिय क्रिकेट काउन्सिल (आईसीसी)ले नयाँ विश्व टेस्ट च्याम्पियनसिपको ढाँचा टुंगो नलगाइसकेकाले केही विषय अझै स्पष्ट भइसकेका छैनन् ।
यद्यपि, इङ्ल्यान्ड बोर्डले नेपाल भ्रमणलाई गम्भीर रूपमा विचार गरिरहेको बताइएको छ । इङ्ल्यान्डले नेपाल भ्रमणका क्रममा दुई वा तीन खेलको टी–२० अन्तर्राष्ट्रिय श्रृंखला खेल्न सक्ने सम्भावना छ ।
टी–२० विश्वकपका क्रममा नेपाली समर्थकहरूको उत्साहले अन्तर्राष्ट्रिय क्रिकेट जगतको ध्यान आकर्षित गरेको थियो ।
नेपालका कप्तान रोहित पौडेलले पनि त्यतिबेला इङ्ल्यान्ड वा अष्ट्रेलियाजस्ता ठूला टोली नेपाल आउनु नेपाली क्रिकेटका लागि महत्त्वपूर्ण हुने बताएका थिए । उनले नेपालमा ठूला राष्ट्रको भ्रमणले विश्व क्रिकेटमा नेपालको उपस्थिति अझ मजबुत हुने बताएका थिए ।
यसैबीच, बेलायती प्रसारण संस्था स्काइ स्पोटर्सले आइतबार ‘नेपाल: क्लाइम्बिङ क्रिकेट्स माउन्टेन’ नामक वृत्तचित्र प्रसारण गरेको थियो । उक्त कार्यक्रममार्फत नेपालको क्रिकेटप्रतिको उत्साह र बढ्दो लोकप्रियता प्रस्तुत गरिएको थियो । कार्यक्रममा पारस खड्काले नेपाली क्रिकेटलाई अन्तर्राष्ट्रिय अवसर र अनुभव आवश्यक रहेको बताएका थिए ।
उनले टेस्ट खेल्ने राष्ट्रसँग नियमित प्रतिस्पर्धाले नेपाली खेलाडीहरूको स्तर अझ उकासिने र नयाँ पुस्तालाई प्रेरणा मिल्ने धारणा राखेका थिए । उनका अनुसार, क्रिकेट अहिले नेपालमा खेलमात्र नभई राष्ट्रिय एकताको महत्त्वपूर्ण माध्यम बनिसकेको छ ।
