२६ जेठ २०८३, मंगलबार
आईसीसी क्रिकेट विश्वकप लिग–२ शृंखलाको सोमबार जारी स्कटल्यान्डविरुद्धको खेलमा नेपाली टोलीका ब्याट्सम्यान इशान पाण्डेले अर्धशतक बनाएका छन् ।
कीर्तिपुरस्थित अन्तर्राष्ट्रिय क्रिकेट मैदानमा जारी खेलमा इशानले ५३ बलमा दुई छक्का र पाँच चौकाको मद्दतले अर्धशतक पूरा गरेका हुन् ।
२८ वर्षीय बायाँहाते ब्याट्सम्यान इशानले शनिबारमात्र अमेरिकाविरुद्धको खेलमार्फत एकदिवसीय अन्तर्राष्ट्रिय क्रिकेटमा ‘डेब्यू’ गरेका थिए ।
आफ्नो पहिलो खेलमा उनी २० रनमा अविजित रहेका थिए । उनले आफ्नो दोस्रो एकदिवसीय अन्तर्राष्ट्रिय खेलमै अर्धशतक पूरा गरेका हुन् ।
इशानले चारवटा टी–२० अन्तर्राष्ट्रिय खेल पनि खेलेका छन् । तर, उनले टी–२० अन्तर्राष्ट्रियमा पनि अर्धशतक बनाउन सकेका थिएनन् ।
स्कटल्यान्डविरुद्धको जारी खेलमा नेपालले २७.२ ओभरमा दुई विकेट गुमाएर एक सय ५३ रन बनाएको छ ।
स्कटल्यान्डले दिएको एक सय ९५ रनको लक्ष्य पछ्याउँदै नेपालले जवाफी ब्याटिङ गरेको हो ।
