प्रतिनिधि सभा नियमावली मस्यौदा समितिको प्रतिवेदन बहुमतले पारित भएको छ ।

 विपक्षी दलको विरोध र नाराबाजीका बीच आइतबार राति सभामुख डीपी अर्यालले मस्यौदा समितिका सभापति गणेश पराजुलीले निर्णयार्थ पेस गरेको प्रतिवेदन बहुमतले पारित भएको घोषणा गरेका हुन् । 

सभामुख अर्यालले प्रतिनिधिसभा नियमावली मस्यौदा समितिको प्रतिवेदन, २०८३ को नियम २ देखि २६३ सम्म र अनुसूची १ देखि ७ सम्म उक्त नियमावलीको अङ्ग बनेको घोषणा गरे । बैठकले नियमावली मस्यौदा समितिको प्रतिवेदनका सम्बन्धमा सभापति पराजुलीले जवाफ दिने क्रममा स्वीकार गरेको संशोधन स्वीकृत गरेको थियो ।

यसअघि अर्यालले प्रतिनिधिसभा नियमावली मस्यौदा समितिको प्रतिवेदन, २०८३ माथि प्राप्त संशोधनलाई निर्णयार्थ प्रस्तुत गर्न थालेदेखि नै विपक्षीले अवरोध सुरु गरेका थिए । तर सभामुखले जबरजस्ती बैठकको कारबाही अघि बढाएपछि सदनमा घम्साघम्सी भएको थियो । 

विपक्षी दलहरूले प्रतिनिधिसभा नियमावलीको मस्यौदामा दर्ता भएका संशोधन प्रस्तावमाथि विषयगत समितिमा पठाएर थप छलफल गर्नुपर्ने माग गरेका थिए ।