प्रधानमन्त्री वालेन्द्र शाहले प्रतिनिधिसभाको प्रश्नोत्तर कार्यक्रममा दिएको सीमा सम्बन्धी अभिव्यक्तिको विषयलाई लिएर विपक्षी दलहरूले सोमबार प्रतिनिधिसभा बैठक अवरुद्ध गरेका छन् ।

बैठक शुरू हुनेबित्तिकै नेपाली कांग्रेसलगायत विपक्षी दलका सांसदहरू आ–आफ्नो स्थानबाट उठेर विरोध जनाएका थिए । विपक्षी सांसदहरूले प्रधानमन्त्रीले आइतबार संसद्‌मा दिएको अभिव्यक्तिबारे स्पष्ट जवाफ दिनुपर्ने माग गरेका छन् ।

विरोधका क्रममा नेपाली कांग्रेसका प्रमुख सचेतक निश्कल राईले प्रधानमन्त्रीको भनाइ राष्ट्रिय स्वाभिमान र राष्ट्रिय हितसँग जोडिएको विषय भएकाले त्यसबारे संसद्‌मै स्पष्टीकरण दिनुपर्ने बताएका थिए । 

उनले प्रधानमन्त्रीले ‘नेपालले पनि भारतको जग्गा मिचेको छ’ भन्ने अभिव्यक्ति दिएको विषय गम्भीर रहेको भन्दै कांग्रेसको औपचारिक असहमति रहेको जनाएका थिए ।

विपक्षी दलहरूको निरन्तर अवरोधपछि सभामुख डोलप्रसाद अर्यालले प्रतिनिधिसभा बैठक आजै १५ मिनेटका लागि स्थगित गरेका छन् ।

प्रधानमन्त्री शाहले आइतबार प्रतिनिधिसभामा भएको प्रश्नोत्तर कार्यक्रममा नेपाल–भारत सीमा विवादबारे दिएको अभिव्यक्तिपछि प्रमुख प्रतिपक्षी नेपाली कांग्रेससहितका विपक्षी दलहरूले आपत्ति जनाउँदै आएका छन् । 

एमालेले पनि विज्ञप्ति जारी गरेर प्रधानमन्त्रीको भनाइप्रति गम्भीर आपत्ति जनाएको छ ।

सोमबारको संसद् बैठकमा राष्ट्रिय प्रजातन्त्र पार्टी (राप्रपा) संसदीय दलका नेता ज्ञानेन्द्र शाहीले नेपालले पनि भारतको भूमि मिचेको भन्ने प्रधानमन्त्रीको अभिव्यक्ति संसद्को रेकर्डबाट हटाउन माग गरेका थिए । प्रधानमन्त्रीले संसद्‌मा दिएको अभिव्यक्तिबारे प्रमाण दिनुपर्ने उनले बताए ।