राष्ट्रिय स्वतन्त्र पार्टी (रास्वपा) का सभापति रवि लामिछानेको आह्वानमा सोमबार सिंहदरबारमा बसेको सर्वदलीय बैठक बिनाकुनै सहमति टुंगिएको छ। संसद्‌मा जारी गतिरोध अन्त्य गर्ने उद्देश्यका साथ बोलाइएको बैठकमा सत्तापक्ष र प्रतिपक्षबीच कुरा नमिल्दा संघीय संसद्मा विपक्षी दलहरूले आफ्नो अवरोधलाई कायमै राख्ने भएका हुन् । 

सिंहदरबारस्थित सार्वजनिक लेखा समितिको हलमा बसेको बैठकमा मुख्यतः दुईवटा विषयमा छलफल भएको थियो। जसमा रास्वपा सभापति रवि लामिछानेको हालै भएको भारत भ्रमण र संसद्को गतिरोध अन्त्य गर्ने विषय समावेश थिए।

एमालेका प्रमुख सचेतक ऐन महरका अनुसार बैठकमा रास्वपा सभापति रवि लामिछानेले भारत भ्रमण र सीमा विवादलगायत विषयमा आफू र परराष्ट्रमन्त्री शिशिर खनालले संसद्मा बोल्ने प्रस्ताव राखेका थिए । तर, विपक्षी दलहरूले उक्त प्रस्तावलाई पूर्ण रूपमा अस्वीकार गरिदिएको महरले बताए । 

उनका अनुसार विपक्षी दलहरूले नेपाल–भारत सीमा र प्रधानमन्त्रीको अभिव्यक्तिको विषयमा स्वयम् प्रधानमन्त्री बालेन शाह नै संसद् बैठकमा उपस्थित भएर जवाफ दिनुपर्ने अडान राखेका छन् । 

महरले प्रधानमन्त्री सदनमा आएर जवाफ नदिएसम्म आफूहरूको विरोध र सदनको अवरोध जारी रहने स्पष्ट पारे । ‘सदनमा परराष्ट्रमन्त्रीले जवाफ दिनुहुन्छ, परराष्ट्रमन्त्रीले जवाफ दिइसकेपछि आवश्यकता पर्यो भने मैले पनि जवाफ दिइहाल्छु । तर, अहिले प्रधानमन्त्री आउन सक्नुहुन्न भनेर उहाँले भनिसकेपछि हामीले त्यसो हुँदैन, प्रधानमन्त्री आएर नै जवाफ दिनुपर्छ भनेपछि बैठक सकियो,’ उनले भने, ‘प्रधानमन्त्रीले संसद्मा आएर यसको जवाफ दिनुपर्छ र स्पष्ट बनाउनुपर्छ ।’