काठमाडौं – चेल्सीले केपा अर्रिजाबालागालाई ९२ मिलियन डलरमा किन्नका लागि अन्तिम सम्झौता गर्न लागेको छ ।

केपाका प्रतिनिधि र वकिलहरू बुधवार भ्यालेन्सियास्थित ला लिगा मुख्यालय पुगेर पैसा तिर्न लागेका छन् । केपा अब लन्डन गएर स्वास्थ्य जाँच गराउन अनि व्यक्तिगत शर्तलाई अन्तिम रूप दिन तयार देखिन्छन् । 

केपालाई किनेमा चेल्सीको पुरानो ट्रान्सफर कीर्तिमान भंग हुनेछ । पोहोर साल चेल्सीले अल्भारो मोराटालाई रियल मड्रिडसँग ९० मिलियन डलरमा किनेको थियो । 

सम्झौतामा हस्ताक्षर भएपछि केपा अब संसारका सबभन्दा महंगा गोलकीपर हुने भएका छन् । एक महिनाअघि एलिसन ८५ मिलियन डलरमा लिभरपूल प्रवेश गरेका थिए । 

चेल्सीका वर्तमान गोलकीपर थिबाउट कोर्टोआ रियल मड्रिड जान चाहेपछि क्लबको अभ्यास समेत छोडेका थिए । त्यसपछि चेल्सीले गोलकीपरको खोजी गर्दा केपासँग सम्झौताको स्थिति बनेको हो । 

मड्रिडले कोर्टोआलाई ४० मिलियन डलर तिरेर पहिलेदेखि नै भित्र्याउन खोजिरहेको थियो । चेल्सीले त्यो रकम समेत जोडेर केपालाई ल्याउने प्रयास गरेको हो । 

अनि मउरिजियो सार्रीको प्रशिक्षणमा रहेको चेल्सीले रियल मड्रिडका मिडफील्डर म्याटिओ कोभासिचलाई पनि ऋणमा भित्र्याउन खोजिरहेको छ । 

मड्रिडका व्यवस्थापक जुलेन लोपेतेगुइले कोभासिच चेल्सी गएमा उनको ठाउँमा उच्च स्तरको खेलाडी ल्याउने प्रयास गर्ने बताएका छन् । 

तर बिहीवार ट्रान्सफर विन्डो बन्द हुने भएकाले सार्री र चेल्सीले हतार गर्नुपर्ने भएको छ ।

गोल डट्कमबाट