काठमाडौं –संसदीय सुनुवाइ विशेष समितिले प्रधानन्यायाधीशमा अस्वीकृत गरेका न्यायाधीश दीपकराज जोशीले सर्वोच्च अदालतमा पेशी पाउन छाडिसकेका छन् । 

नवनियुक्त प्रधानन्यायाधीश चोलेन्द्रशमशेर राणाले ‘संसदीय सर्वोच्चताको सम्मान’ भन्दै पदभार सम्हालेको दिनदेखि नै जोशीका लागि पेशी तोकेका छैनन् । 

बुधवार सर्वोच्च अदालतको प्रधानन्यायाधीशको पदभार सम्हालेका राणाले जोशीलाई राजीनामा दिएर ‘मार्ग प्रशस्त’ गर्न आग्रह गरिसकेका छन् । तर जोशी भने आफू प्रधानन्यायाधीशमा अस्वीकृत भएपनि न्यायधीशका रूपमा काममा रहिरहने अडानमा छन् । 

जोशीको चेम्बर सारियो 

जोशी यसअघि सर्वोच्च अदालतको मूख्य भवनअन्तर्गत इजलाश नम्बर १ को चेम्बरमा बस्ने गर्दथे । सर्वोच्चका वरिष्ठतम् न्यायाधीशले प्राय १ नम्बर इजलाशको चेम्बर पाउँछन् । 

तर राणाले इजलाश नदिएपछि जोशी बुधवारदेखि चेम्बरमा बसेर घर फर्किने गर्दथे । बिहीवार भने सर्वोच्च अदालत प्रशासनले जोशीको चेम्बर नै सारिदिएको छ । 

‘जोशी श्रीमानले इजलाश नपाउने भएपछि १ नम्बर इजलाशमा अन्य श्रीमानले पेशी हेर्ने हुनुभयो,’ सर्वोच्च स्रोतले लोकान्तरसँग भन्यो, ‘उहाँले चेम्बरमा बसिरहँदा अन्य श्रीमानलाई इजलाशमा छिर्नै समस्या भयो । त्यसैले उहाँको चेम्बर सारिएको छ ।’

सर्वोच्च प्रशासनले जोशीको चेम्बर सर्वोच्च अदालतको एनेक्स भवनमा स्थानान्तरण गरेको छ । जोशी बस्ने चेम्बर भने सर्वोच्चका न्यायाधीश दीपकुमार कार्कीले पाएका छन् । वरिष्ठताका हिसाबले कार्की जोशी पछिको दोस्रो वरीयताका न्यायाधीश हुन् । 

सर्वोच्चबाट फर्केर घरमा ध्यान गर्दै जोशी     

नवनियुक्त प्रधानन्यायाधीश राणाले पेशी नतोक्ने घोषणा गरेपनि न्यायाधीश जोशीले आफू नियमित रूपमा सर्वोच्च आउने जनाएका थिए । बुधवार लोकान्तरसँगको कुराकानीमा जोशीले आफू न्यायाधीशमा अस्वीकृत नभएकाले नियमित रूपमा सर्वोच्चमा हाजिर हुने बताएका थिए । 

बिहीवार पनि जोशी नियिमितजस्तै सर्वोच्च पुगेका थिए । तर उनी पुग्दा सर्वोच्चका कर्मचारीहरू उनको कार्यकक्षका सामान एनेक्स भवनमा सार्दै थिए । जोशीले कर्मचारीसँग जिज्ञासा राख्दा आफ्नो चेम्बर सारिएको जानकारी पाए । आफ्नो चेम्बर सारिएपछि कार्यालयमा हाजिर मात्रै गरेर घर फर्किए । 

जोशी घर फर्किएपछि ध्यानमा रहेको उनको पारिवारिक स्रोतले लोकान्तरलाई जानकारी दियो । जोशीको चेम्बर सारिएको विषयमा बुझ्न खोज्दा उनको पारिवारिक स्रोतले भन्यो, ‘उहाँ बिहानै कार्यालय गएर घर फर्किनुभएको थियो । अहिले उहाँ ध्यानमा हुनुहुन्छ ।’