काठमाडौं – पाँचथरको मिक्लाजुङ– ६ का नेलकम माखिमलाई आज (मंगलवार) बिहान ३ बजेको समयमा एउटा कल आयो ।

नेलकम निद्रामा नै थिए । फोन आएपछि ब्यूँझिए । फोन थियो काका नाता पर्ने मानबहादुर माखिमको ।

मिक्लाजुङ– ७ का मानबहादुर तिनै व्यक्ति हुन्, जसको शव मिक्लाजुङ– ८ मा करमको रुखमा झुण्डिएको अवस्थामा फेला परेको छ । 

मिक्लाजुङ– ३ मा उनका ससुरा बमबहादुर फियाक र साढुदाइ धनराज शेर्माको परिवारका ९ जनाको गएराति नै विभत्स हत्या भएको छ ।

उक्त हत्याकाण्डमा मानबहादुरकै संलग्नता हुनसक्ने प्रारम्भिक अनुमान प्रहरीको छ ।

काकाको फोन देखेपछि नेलकमले रातको समय भए पनि ‘रिसिभ’ गरे ।

‘रातिको ३ बजे फोन गर्नुभएका काकाले मलाई भन्नुभयो– मेरो पुरानो रोग बल्झियो । म उपचारका लागि झापा झरेको छु । औषधि खानका लागि मलाई ५ हजार चाहियो । भाइ आउँछ, उसलाई ५ हजार दिएर पठाइदे ।’

उनले ‘हुन्छ’ भन्दै फोन राखे । सम्भवतः मानबहादुरले गरेको त्यो नै अन्तिम कल हुनसक्ने नेलकमको अनुमान छ । थप कुरा उनको फोन हेरेपछि नै खुल्ने छ ।

काका मानबहादुरले पहिले मानसिक रोगको उपचारका लागि ट्याब्लेट खाने गरेको थाहा पाएको नेलकमले लोकान्तरलाई जानकारी दिए ।

मानबहादुरको परिवारमा करीब ७५ वर्षीय बुवा र आमासँगै दुई भाइ र एक बहिनी छन् । विवाह भइसकेकी बहिनी माइतीमै रहेको नेलकमले बताए ।

दुई दिदी विवाह भएर आ–आफ्नो घर गइसकेका छन् ।

केही समय विदेश पनि बसेका मानबहादुर करीब २ वर्षयता घरमै रहेको नेलकमले जानकारी दिए ।

मानबहादुर र आफ्नो खलक एउटै भएको उनको भनाइ छ ।

यो पनि पढ्नुस्

भतिजाको बयान : घरज्वाइँ नबस्दा सम्बन्धविच्छेदको प्रक्रिया, अंशमा कुरा अड्किएपछि ..